شەفەق نیوز/ ئەحمەد جەلیل ئلوەیس ئامادەکار بەرنامەیل لە کەناڵ عراقیە، ئاگادار ڕەوانگەی عراق ئەرا ئازادیەیل رووژنامەوانی لە سەندیکای رۆژنامەنووسەیل عراقی کرد، ک کەسەیلیگ نەناسریاگ شەفەق ئمڕوو شەممە، ئاگر ماشینەگەی دانە ک لە دەر ماڵەگەی وسیاگە،  و هوکار ئی کار تاوانیە نیەزانێد.

ئلوەیس ئەرا رەوانگەگە وت: جویر ئامادەکار بەرنامە لە کەناڵ عراقیە کار کەم، هویچ وەختیگ لایەنگر ململانەیگ نەویمە، و دروسکەر گوبەن نەویمە، چ سیاسی بوود یا چشتیگتر، باوجی کەفتمە وەر هەڕشەی زبریگ ژیانم کەێدە ئامانج، ک لە ساعەت سێ ونیم شەفەق لەدەنگ دەرکوتان هاوساگەم هاتمە خەوەر، و هەنای چیمە دەیشت، نووڕیم ئاگر لە ماشینەگەم بڵویزە کەێد، و گەنجەیل گەڕەکەگە رەسینە کپەوکردنی، و هەنای پرسیار کردم، دەرکەفت ک دوو کەس وە بومب مولوتۆف ئاگر ماشینەگەم دانە.

رووژنامەنویسەگە وتیش: هەنای چیم ئەرا بنکەی پۆلیس تا ئی رویداوە توومار بکەم، کەوڵ پەیامیگ پەیا کردم و گولەیگ لەناوی بوی، ولە قەیی نویسیاگە (لایەن سێیەم) وهیمان شۆک بویمە لەو رویداوە، نیەزانم چوین ئیجویر کاریگ وەبی سزادان رەد بوود، ئی کارە وەگەرد چەن هاوڕییگ راگەیانکار و روشنهویر بویە، ئایا وڵاتەگە بویە قەڵای ئاژاوەکەرەیل، و ئەرا ئیمە تەنگەو بویە، ئەرا کوو بوایمن و تا کەی؟.

ئلوەیس داوا لە وەزیر ناوخۆ کرد لێکوڵینەوە لەی رویداوە بکەێد، و ئومید خوازێد بڕەسێدە ئەوانەگ خوازن دەنگ راگەیانن کپەو بکەن، بیجگە نووڕین لایەنگری وناسنامەیلیان، ک گشتی لەنوای یاسای جویریەکن.