دەزگاگە لە بەیاننامەیگ وت: مەفرەزەیلی لە پارێزگای دیالە لە بنەمای زانیاری هەواڵگری هویرد توەنستن دوو کەس دەسگیر بکەن ک هاوڵاتی (فەتاح محمد عەبدولکەریم فەتاح دەلو) کوشتنە، ک وەریەوبەر بانزینخانەی (زەینل قەوس)ە لە خانەقین.

وەگورەی بەیانامەگە، دوو بکوشەگە دریانە دەس لایەنەیل پەیوەندیدار تا ریکارەیل یاسایی وەگەردیان جیوەجی بکریەێد.

لە شەو سەر ساڵ نوو، سەرچەوەیگ ئەمنی لە شار خانەقین، خەوەردا لە کوشتن خاوەن بانزینخانەیگ وە گولەی کەسەیلیگ نەناسیاگ لەناوڕاس شارەگە.

سەرچەوەگە وتیش: چەکدارەیلیگ نەناسیاگ پەلامار خاوەن بانزینخانەیگ وەناو فەتاح دەلو لەناو ماشینەگەی دانە لە ناوچەی توڵەفروش ک وەکوتپڕ گیانی لەدەسدا و واینە.

وەگورەی سەرچەوەیلیگ لەناو شارەگە، ئەو بکوشەیلە شەو سەر ساڵ زایینی نوو، وەگەرد سەرقاڵی مەردم وە ئاهەنگ سەر ساڵ، و لەناو دەنگ تەقەی ئاگربازی لەو شەوە، ئەو تاوانیانە جیوەجی کردنە.