شەفەق نیوز/ فراکسیۆن یاسا وەسەرپەرشتی مالکی، ئمڕوو سێشەممە، باسکرد ک محمد حەلبوسی سەرۆک ئەنجومەن نوێنەران رازی نیە یاسای هەڵبژاردن بخەێدە خشتەی کارەیل ئەنجومەنەگە ئەرا دەنگداین لە راسەوکردنی.
گاتع رکابی ئەندام فراکسیۆنەگە ئەرا ئاژانس شەفەق نیوز وت: سەرۆک پەرلەمان ئووشێد؛ لەماوەی وەرین دەنگ دریا بان یاسای هەڵبژاردن و نیەوود دەنگدانەگە دووارە بکریەێد، مەگەر دویای واژوو کردن سەرۆک کۆمار وبڵاوکردنی لە رۆژنامەی فەرمی.
وتیش؛ حەلبوسی خەوەردار ‌هێزە سیاسیەگان کردگە ک بوود یاسای هەڵبژاردن بخریەێدە وەردەس ئەرا راسەوکردن بەشیگ لە تەوەرەگانی دویای واژووکردن سەرۆک کۆمار لەبان یاساگە، و ئەوە بوود لە ری وەرووخستن داواکارییگ ئەرا سەرۆکایەتی پەرلەمان وە واژووی ١٠٠ پەرلەمانتار ئەرا راسەوکردن تەوەرەیل یاساگە.