شەفەق نیوز/ سەرچەوەیگ ئەمنی لە دیالە، ئمڕوو یەکشەممە، ئاشکرای هویردەکاریەیل رفیان و کوشتن بزگیریگ لە سنوور خوەرهەڵات پارێزگاگە کرد، ک گاڵداین تاوانەگە مەزهەوی بویە.

سەرچەوەگە ئەرا ئاژانس شەفەق نیوز وت: دوو کەس مەزەنە کریەێد لەناو یەکیگ لە باڵە چەکدارەیل کار کەن، بزگیریگ لەناو تەمەن پەنجا ساڵان خەڵک ناوچەی ندا لە باکوور مەنەلی رفاننە، و بردنەسەی وەرەو زەوییگ کشتوکاڵی وە دویری ١٥ کیلومەتر لە ناحیەی قەزانیە، لە ناوچەی شەعنون کنار ناو ناوچەی تەوساق لە سنوور مەنەلی، و لەورا کوشتنەسەی ونانەسەی خاک.

دیاری کرد ک تەرمەگە لەناو زەوییگ لە پارێزگای واست کنار پارێزگای دیالە لەژیر خاک پەیای کریا، وتیش: دەزگا ئەمنیەیلە لەبنەمای مینەکردن و وەشکین هەواڵگری توەنستن یەکیگ لە بکوشەیل دەسگیر بکەن، و ئەوەکە دویای دەورگردن ماڵەگەی وایە، وهیمان هیزە ئەمنیەیلە کەفتنەسە شوینی.

سەرچەوەگە ئاشکرا کرد ک رویداوەگە وەگورەی قسەی توومەتبارەگە مەزهەوی بویە وە دەسپیچگ ئەوە ک گوایە قوربانیەگە پاڵپشتی گرووپەیل تیرۆری کەێد، وهیمان لێکوڵینەوە وەردەوامە ئەرا رەسین وە بندروس کارەگە.

زانیاریەیلیگ ئاژانس شەفەق نیوز لەلی ئاگادارە، وهیمان راسیەگەی مسۆگەر نییە، ئویشن: قوربانیەگە بزگیر فرووشتن و سەنین پەسە، وەناو مەهدی تەلاگ مسەرهەد، کەسیگە لەناوچەی ندا ناسیاگە، ئمڕوو تەرمەگەی لە دەورگرد ناحیەی قەزانیە پەیا کریا، ک لەورا نریاسە خاک، دویای ئەوە ک کەسەیلیگ داوای ٢٠٠ هەزار دۆلار لە خانەوادەی کردنە.