شەفەق نیوز/ لە ٢٨ کانوون دویەمەو، واتە ٥ رووژ وەرجە ئیسە، جەهان و عراق و ئیران و فرەیگ لە وڵاتەیل ناوچەگە چەوەڕی سروشت ئەو وەڵام ئەمریکییە کەن کە واشنتۆن پەیمانی دا، یەیش لە وەڵام وەئامانجکردن فراوان بنکەی ئەمریکی لە ئوردن -مەرز سوریا، کە بویە مدوو گیانلەدەسدان 3 سەرباز ئەمریکی و زەخمداری 40 سەرباز ترەک.
دویەکە میدیایل ئەمریکی ئاشکرا کردن کە کۆشک چەرمگ “زنجیرەیگ پەلامار فرەیی کە تا چەن رووژیگ وەپی چوود لەبان ئامانجەیل عراق و سوریا” پەسەن کردگە.
ئەو میدیایلە لەناویان سی بی ئێس لە سەرچەوەیل سوپای ئەمریکا بڵاو کردن کە مەوقەی پەلامارەگە بەندە وە سروشت کەشوهەوا، چوینکە هیزەیل کەشوهەوای رووشن خوازن تا ئۆپەراسیۆنەیل وە هویردی ئەنجام بیەن.
نەخشەی کەشناسی نشان دەێد کە کەشوهەوای عراق وە دریوژایی رووژەیل ئایندە و شەو و رووژ ئەور بوود، و لە رووژ تەنیا پەنجشەممەی ئایندە ٨ شوبات رووشنەو بوود، و رووژەیل چوارشەممە و پەنجشەممە (٧ و ٨ شوبات) لە شەو رووشن بوود )، واتە رووژ پەنجشەممە کەشوهەوا و ئاسمان شەو و رووژ وە تەواوی رووشنە.