ئەو مووشەکەیلە بەشیگ گرنگی جبەخانەی وەردەس تەهرانە، کە هەڕەشەی تووڵەسەنین لە ئیسرائیل کەێد لەبان پەلامارەگەی لەبان باڵیۆزخانەی وڵاتەگەی لە سوریا.

 ئاژانس هەواڵی خوەنەوارەیل ئیرانی نیمچە فەرمی لە چەن رووژ گوزەشتە گرافێک نۆ مووشەک ئیرانی بڵاوکرد کە وە وتەی خوەی توەنێد بڕەسێدە ئیسرائیل.

 لە ناو ئەو مووشەکەیلە “سجیل” کە توەنێد زیاتر لە 17 هەزار کیلۆمەتر لە ساعەتیگ بچوود و مەودای تا دوو هەزار و 500 کیلۆمەتر، و “خەیبەر”، وە مەودای تا 2 هەزار کیلۆمەتر، ببجگە لە “حاج قاسم”، کە مەودای 1400 کیلۆمەتر.

 ئیران کە یەکیگە لە بەرهەمکارە سەرەکییەیل فڕۆکەی بێفڕۆکەوانە لە مانگ ئاب ساڵ گوزەشتە راگەیان کە فڕۆکەیگ بێفڕۆکەوان پیشکەفتگ و دروسکریای خوەیان وە ناو “موهاجر-١٠” دروسکردگە کە مەودای تا ٢٠٠٠ کیلۆمەتر بڕێد و توانای باڵگردن تا ماوەی ٢٤ کاتژمێر و هەڵگردن تا 300 کیلۆگرام دیرێد.

تەهران دووپات کردگە کە مووشەکەیل بالستیک کە مەودای رەسێدە دوو هەزار کیلۆمەتر، هیزیگ گرنگن ئەرا مقیتیکردن و تووڵەسەنین لە دژ ئەمریکا، ئیسرائیل و ئامانجە ئەگەریەیل ترەک ناوچەگە، و ئویشێد تەقەلای وەدەسهاوردن چەک ئەتۆمی نیەێد.

 مانگ حوزەیران ساڵ گوزەشتە ئاژانس هەواڵی کۆمار ئیسلامی (ئیرنا) بڵاو کرد کە ئیران پەردە لەمل ئەو چشتە لادا کە وەرپرسەیل وە یەکەم مووشەک بالیستیکی هایپەرسۆنیک (لە دەنگ تونتر) باسی کردن.

موشەکە هایپەرسۆنیکەیل توەنن وە خێرایی لەلای کەمەو پەنج ئەوەنەی خێرایی دەنگ و لەریەیل سەختیگ بچن؛  کە یەیش هیلێد ریگریکردنی سەخت بوود.

کۆمەڵەی کۆنترۆڵکردن چەک کە ریخریاگ ناحکومییە و بنکەیل لە واشنتۆن وت: بەرنامەی مووشەکی ئیران ئاست فرەیگ پشت وە دیزاین کۆریای باکوور و رووسیا بەسێد و سوود لە دەسمیەتی چین وەرگرێد.

وتیش؛ مووشەک بالیستیکی مەودای کوڵ و مامناوەندی ئیران بریتین لە “شەهاب-١” کە مەودای نزیکەی ٣٠٠ کیلۆمەترە و “زولفیقار” کە مەودای ٧٠٠ کیلۆمەترە.

 ببجگە لە “شەهاب-٣” کە مەودای ٨٠٠ تا هەزار کم، “عیماد-١” کە مەودای دوو هەزار کم و “سجیل”، کە مەودای 1500 تا 2500 کم.

 هەرلیوا ئیران خاوەن مووشەک کروز KH-55 کە لە ئاسمانەو وەشیەێد و توانای هەڵگردن سەر ئەتۆمی دیرێد و مەودای 3000 کیلۆمەترە، و مووشەک دژە کەشتییە مۆدێرنەیل کە مەودای 300 کیلۆمەترە، توانای هەڵگردن سەرەیل جەنگی دیرێد کە کیشی 1000 کیلۆگرامە .