شەفەق نیوز/ نۆ کەس سوری، هەشت مناڵ لەناویان بویە ئمڕوو چوارشەممە، لە شار بۆرسە باکوور خوەرئاوای تورکیا، دویای هیزگردن ئاگریگ لەناو شوقەیان گیانیان لەدەسدان، و دەسەڵاتەیل دیاری کردن ک ئاگرەگە لە کوانی چیلگ هیز گردیە.
ئاژانس ئەنادۆڵ فەرمی لە زوان حاکم ناوچەی بۆرسە یەعقوب کانبولات وت: تەرم نۆ کەس لەناو هەس، هەشتیان مناڵە.
کانبولات وتیش: نۆ قوربانیەگە لە رەگەزنامەی سوریین.
وەگورەی میدیایل راگەیانن تورکیا، قوربانیەیل ژنیگە وەگەرد شەس مناڵی ک تەمەنیان لەناوبەین یەک ساڵان تا ١٠ ساڵانە، وەگەرد دوو کوڕ برای لە تەمەن ١١ و ١٢ ساڵان.
باوگەگە ک مەوقەی هیزگردن ئاگرەگە لە پرسەیگ لە ئیستەنبول گلەو خواردیە، ئەویش وە دویکەڵ تاسیایە مەوقەی تەقەلای رزگارکردن خیزانەگەی و گیانی لە دەسدایە.
عەلی ئەنوەر ئەکتاش سەرۆک شارەوانی شارەگە لەبان تویتەر نویسان: هاتێ ئاگرەگە لە کوانی چیلگ لەناو شوقەی خانەوادەگە هیز گردیە، ک ئەو خانەوادە ک لە ساڵ ٢٠١٧ پەنابەرە لە تورکیا.
وەگورەی شمارەیل فورمی ٣،٧ مەلیۆن پەنابەر سوری لەلای کەمەو هانە تورکیا، و فرەیان لە دەسکردن جەنگ سوریا لە ساڵ ٢٠١١ رەسینە ئەولا.