شەفەق نیوز/ پیرە مەردیگ دەس وەگووچان، تا وەلای نانەواخانەگەی ١٤ رەمەزانەو رەد بوود، هەناسەیگ هەڵکیشێد، ئی جارە، با لەلی بپرسیمن، ئەرا تا وەیلاو رەد بوێ ئی هەناسەی قۊیلە هەڵکیشێ؟. 

پیرە مەردەگە سەریگ لەقان ووت: هەنای مناڵ بۊیم، وەدزیەو هاتیامە ئیلا، لە ژیر دەرەگەو نووڕستیامە جیهانیگ تر، ئیسە هۊیچ ئاسەواریگی نەمەنیە، تەنیا ئەوەگ هالە ناو هۊیرم، وپیاویگیش لە لف خوەم نەمەنیە، تا ئەوەگ لە هۊیرم نەمەنیە ئەرام بکەێدە یاد. 

لەشۊین ئی نانەواخانە، جی  گورانی و مۆسیقا و مەقام و چالغی بویە، منیش وەو مناڵی خوەمەو، لەژیر دەرەگەو جیهانیگ جیواز تەماشا کردیام، تا ئیسەیش جۊی ئەو جیهانە نەیم، نە لە راسی ونەیش لە خەو، چوینکە ئەوسا نەیشتیان مناڵ بچودە ئی شۊینەیلە، وهەنای گەورا بۊیم، ئەو شۊینە لە خانەقین نەمەنم  ئیمە ک یە ژنەفتیمن، چیمنە بندروسی. 

وەو پیچەڵپیچە، لە پشت دوکانەیل، لە شۊنیگ شاریاگ، لە سۊیکیگ لەهۊیرچگ، لەجەرگەی بازاڕ خانەقین، مۆسیقا لە گوش گرەیل خوەی چەوهەشارەکی کەێد، دەنگ چەپڵەیلە چیەسە ناو شەق دیوارەیل، شۊینیگە چودەو ئەرا ساڵەیل چلەیلە لە سەدەی گوزەیشتە، هۆڵ گەورەیگ ها ناوی، سەکو شانۆیگ ها ئەو بەرزیە، کریایە ئەرا تیمیگ مۆسیقا، وشۊنیگ لۊلەیی ئەرا دەرچین دۊکەڵ گەرمەوکەرەگە، نەقشەیل رەنگینیگ وە گەچ ها قەیەو، ودیارە ک دۊیایی کریاسە چایخانی سادەیگ. 

تا ئیسە ئەو ئاسەوارە لەیلا شاریاسەو، تا بۊیسە شۊین کەڵەکەی چشتەیل یەکیگ لەنانەواخانەیل خانەقین.   

وێنەگر خالید فەرەج ( خالد الجبل) خانەقین.