شەفەق نیوز/ چمان ئەو ناوچە لە بەغدادەو بڕیاگە، هەنای وەناو (بەتاوین) ناوڕاس بەغداد رەد بۊێ، تایبەت لەلای سەر جادەی سەعدون و یەکەم سێ کۊچەیلەی، دەس خەێدە گیرفانەیل خوەد، و پڕ لە گومان بۊێ، هەنای نووڕێدە ئەو ژنەیلە لەبان زەۊ نیشتنە، یا وسیانە تا مەردمەگە ئەرا کار لەشفرووشی بکیشن.
یە باس ئەو سێ جادەی ناوچەگەس، ک ئاژانس شەفەق نیوز سەر کردە ناویان، و دۊای ئەوەگ دەیان شیوەی باسەیلیگ ئەرای رەسی، لەباوەت چەتەیل هووشبەری و ئەندامەیل لەش ئایەم فرووش و لەشفرووشی و گەیاکردن و تاوان و کردەوەیلیگ گومانی، ئەوەیش وەگەرد یانەیل شەوانەی بی مووڵەت، ک مینێدە شاریگ لەدەس دەسەڵات دەرچگە، و یەسە ک خەڵک ئەو ناوچە زیان تاڵ خوەیان باس کردن، و لەلاییگتر سەرچەوەیگ ئەمنی باسەیلیگ لە مافیایلیگ کرد ک لە ئاسایش ناوچەگە دەسیان چوودە لای سەرکردە ئەمنیەیلە و مقەیەتیکردن حزبی ئەرا ئەو بەدکاریە ک لەناو ئەو سێ جادە لەناو دڵ بەغداد بڵاو بۊە.
دانشتگەیل بەتاوین: جادەیلمان پڕ لە تاوانە
بڕیگ لە دانیشتگەیل ناوچەی بەتاوین، ناوڕاس بەغداد، ئەرا پەیامنێر ئاژانس شەفەق نيوز ئۊشن: ناوچەی ئیمە یەکیگە لەو ناوچەیل پڕ لە بەدکاری، لەوەر فرەیی ماڵەیل لەشفرووشی و دوکانەیل مەی فرووشتن ک هانە ناو ماڵەیلە و حەپەیل هووشبەر و هەمیش بۊەسە پەنای فرە لە تاوانکارەیل و ئەوانەگ لەوەر یاسا لەیرا خوەیان شارنەو.
دانشتگەیل وتنیش؛ یەکەم سێ جادە لە ناوچەی بەتاوین، تایبەت لە سەر جادەی سەعدون لەلای باب شەرقی لە رخبەرترین شۊنەیلە لە بەغداد، ک ئیسە چەتەیل هووشبەری و فرووشتن ئەندامەیل لەش ئایەم هانە ناوی، و دیاری کرد ک بڕیگیش لە هاووڵاتییەیل سوریا ئی شۊنەیلە کردنەسە ماوایگ ئەرا خوەیان، و کار لە گەیاکردن و لەشفرووشی و کارەیل پیسیگ کەن.
وتنیش: بڕیگ لەو ئەندامەیلە ک دڵنگ ئەمنی پووشن، هانە گەرد ئی چەتەیلە، و بەشە پۊلیگ لە دوکانەیل مەی فرووشتن وەرگرن، و لەوانەگ ئی کارەیل پیسە کەن، و دیاری کردن ک ژنەیلیگ هەس کار لەشفرووشی کەن وەئاشکرا هانە ناو جادە سەرکیەگەی ناوچەی بەتاوین، و چەن ئەندامیگ ئەمنی هانە دەوریان، ک وەبی پرس و سزایگ لەلیان بێدەنگن و پاپای چشتیگ نیین. دانشتگەیل دیاری کردن ک ئی ژنەیلە کار دەیوسی کەن و پڕوپاگەندەی لەشفرووشی لەماڵەیلیگ لەناو ناوچەگە کەن، و چایخانەیلیش دەسمیەتی لە بڵاوبۊن هووشبەری کەن، و ئەوانەگ وەی کردەوەیلە توومەتبارن، ئەگەریش کەفتنە وەر هەڵمەتیگ ئەمنی و دەسگیر کریان، دۊای ماوەیگ مەرقەز کریەن، و هەمیش دووارە ئەرا ئی کارەیلە گلەوخوەن.
مافیا و حزبەیلیگ ك دەسیان چوود
لەلای خوەییش، سەرچەوەیگ ئەمنی، داوا کرد ناوی ئاشکرا نەوود، ئەرا ئاژانس شەفەق نیوز وت: بەشیگ لە لایەنە ئەمنیەیلە ک ناوچەی بەتاوین هادەسیان، هاوکاری وەگەرد تووڕەیل لەشفرووشی و بازرگانی هووشبەری کەن، و دیاری کرد ک ئەگەریش سەرکردەیل ئەمنی باڵا بڕیار دان هەڵمەت وەشکین لەی ناوچە جیوەجی بکریەێد، یانە خەوەردار چەتەیلە کەن، تا لە مەوقەی هەڵمەتەگە نەکەفنە وەرچەو، و هەڵمەتەیلە وەبی خود تەواو بوون.
سەرچەوەگە وتیش: لەی ماوەی دۊایینە، کردەوەیل تاوانی لە ناوچەگە کەمەو بۊ، باوجی کارەیل لەشفرووشی و بازرگانی هووشبەری وەردەوامە، و دیاری کرد ک تەماکاری بەشیگ لەوانەگ هانە ناوهێزە ئەمنیەیلە رەسیە ئەوە ک بیلن دوکانەیل مەی فرووشتن لە مانگ موحەرەم و رەمەزان واز بکەن، ئەوەیش وەرانوەر پۊلیگ ک رەسێدە دەس ئەفسەرەیل گەورەیگ لە ناوچەگە.
وتیش: ئاسان نییە کۆنترۆل چەتەیل ئی ناوچە بکریەێد، تایبەت لەو سێ جادە، وتیش: هەڵمەتە ئەمنیەیلە ک ئەرا ماوەی جاریگ جیوەجی کریەێد فرەیان لەوەر بەدیکردن و مرافەی پۊل ناوبەین مافیایلە لەی ناوچە بوود، و ئاگاداری وەناوەیل نادیاریگ لە بڕیگ لە مادەی هووشبەری یا بازرگانی وە ئایەم رەسێدە هێزە ئەمنیەیلە.
سەرچەوەگە هەمیش وت: ئیسە ناوچەی بەتاوین بۊەسە ماوایگ ئەرا ویڵ و گەیاکەرەیل، و یانەیش وەسای مقەیەتیکردن یەکیگ لە حزبەیل وڵاتەگە کار کەن.