ئی ئاوایە زیان لە قەیران ئاو وەردەوامیگ وەخوەی دوینێد، لەوەر کوورەوکردن چەم سەرەکی، کە لە بنەمای فەرمان فەرمانگەی ئاسەواری کە وەسنگ مقیەتیکردن ئاسەواری میژووی ئاو لە هەزار کەس بڕیا، وەبی هویچ قەرەبوویگ.

هشکەساڵی و چووڵکردن

خەڵک ئاوایەگە ئەرا ئاژانس شەفەق نیوز ئویشن: ئیمە لەی ئاوایە زیان لە بڕیان ئاو دیریمن ئەرا زیاتر لە چوار ساڵە، ئەوەیش چوینکە ئاسەواری لە ژیر چەم بەزاز هەس کە ئەو چەمە وەناو ئاوایەگەو رەد بوود، کە بەش ئاسەواری لە قەزای رفاعی فەرمان دادە لایەنەیل پەیوەندیدار تا چەمەگە کوورەو بکەن، و لە ئاوایمان بووڕنەی کە شمارەی دانیشتگەیلی رەسێدە نزیکەی هەزار کەس.

خەڵک ئاوایەگە وتنیش: ئەو چەمە کە لە ئیمە بڕینەی تەمەنی رەسێدە زیاتر لە 100 ساڵ، و حکومەت هویچ چشتیگ لە جیای ئەوە ئەرامان دیاری نەکرد، و داوا لە گشت وەرپرسەیل دەوڵەت کردیمن وەلێ وەبیخود.

خەڵکەگە دیاری کردن کە ئیسە کەفتنەسە رووژ فرە بەدیگ، کە فرەی ئەو دەیان بیرەیل ئاوە کە وەرجەیە هەڵکەنینە ئیسە هشکەو بوینە، کە فرە لە خیزانەیل ئاوایەگە چووڵ کردن، و روی وەرەو شار کردن.

وتنیش: ئیرنگە پشت وە تانکەرەیل ئاو بەسن کە ئەرا ئاوایەگە رەسن، ئا ناچار بوون ئاو بسینن، یا دووارە بیر هەڵکەنن، کە هەر 14 رووژ هەر خیزانیگ بایەسە 100 هەزار دینار خەرج بکەێد، و داوا کردن چارەیگ ئەرایان بکەن.

ری وە خراوکردن ئاسەوارەیل نیەیمن

لەلای خوەییش، وەڕیەوبەرایەتی ئاسەواری لە زیقار وت: رژیم وەرین پاپەی گرنگی ئاسەواری لە وڵاتەگە نەوی، کە جووەگە وەبان شوین ئاسەواری (ئەبو عاموود) کەنیا.

شامل رمیز وەڕیەوبەر فەرمانگەی ئاسەواری زیقار ئەرا ئاژانس شەفەق نیوز دیاری کرد کە فەرمانگەگەی ری وە خراوکردن شوینەیل ئاسەواری نیەێد، و دووپات کرد کە ئەو چەمە لە سەردەم رژیم وەرین لەبان شوین ئاسەواری ئەبو عاموود هەڵکونیا، کە لە وەختە گرنگی وە ئاسەواری وڵاتەگە نەیریا.

دووپاتیش کرد کە فەرمانگەگەی کار چەمەگە وسان چوینکە کەفتیەسە ناو شوین ئاسەواری، کە تا یەک و نیم کێلومتر کەفێدە ژیر چەمەگە، کە وەداخەو تا ئیسە هەڵنەکەنیاس، وەلێ کار پاکەوکردن لە چەمەگە چشتەیل ئاسەواری خەڕگین خستە دەیشت، کە وەگورەی یاسا تەنیا لایەنەیل پەیوەندیدار توەنن دەسکاریی بکەن.

وتیش: فەرمانگەگەی تەمەی ئاڵشتکردن ری چەمەگە کرد، نەک وەیەکجاری کوورەو بوود، وەلێ بەشیگ لە خەڵک ئاوایەگە وەیە رازی نەوینە، چوینکە بایەسە وەناو زەویەیلیان رەد بوود، و کەسیگ رازی نییە زەوی کشتوکاڵی خوەی خراو بکەێد.

ئی ئاوایە ناوی وە ئاوای شەهیدەیل نریا لەبان قوربانیداین کوڕەیلی لە جەنگ داعش لە ساڵ 2014.