ئی ساڵ خوەنەواریە، زیایبوین لە پەلامارەیل چەکدار و دەسدرویژکردن لەبان مەکتەوەیل و کادرەیل پەروەردە وەخوەی دی، دویاتریان ئەو دەسدرویژیە بوی وەلایەن دویەتیگ خوەنەوار وەبان خانمە وەڕیەوبەر مەکتەوەگەی، لە ناوەندی "ئەلجەنائن" لە پارێزگای زیقار، و دەسدرویژکردن کەسوکارەیل خوەنەواریگ لەبان کادر ناوەندی "ئەلزەهرا" لە پارێزگای بەسرە.

دەسدرویژکردن جویراجویر 

پەروەردەکارەیل، کەفنە وەر دەسدرویژکردن لە چەن لایەنیگ، لەیەک لا، لە باوان خوەنەوارەیل، و جاروباریش وەلایەن هیزەیل ئەمنی، ئەوە بوی ک لە مانگ گوزەشتە، هەنای مامووستایل لە وەردەم وەڕیەوبەرایەتی پەروەردەی بەسرە گردەو بوین تا داوای پارچە زەوی بکەن، هیزە ئەمنیەیل دەسەیل سەختیگ لەلیان وەشانن، و ناونەسەق و رەفتار نا شارستانی بەدیگ وەپیان کردن، ک شایستەی مامووستا نییە، وەگورەی قسەی خانمە پەرلەمانتار نادیە عبودی، ئەندام دەسەی پەروەردە لە پەرلەمان عراق.

نادیە خان ئەرا ئاژانس شەفەق نیوز ئویشێد: لە مانگ گوزەشتە لەناو گردەوبوین سەرۆک وەزیرەیل وەگەرد دەسەگە، خوەی داوا لە سەرۆک وەزیرەیل کردگە یاسای مقیەتیکردن مامووستا گورج بکەێد، و بڕەسێدە هانای ئی چین گرنگە لەناو کۆمەڵگا، ک ماف یاسایی خوەیان وەپیان بەێد وە وەرگردن پارچە زەوییگ ئەرا داکاسیان، و خاسەوکردن گوزەرانیان.

کەسەیلیگ لەڕی وڵ بوینە 

لەلای خوەییش؛ عەباس سودانی نەقیب مامووستایل عراق، ئویشێد: زیایبوین دەسدرویژکردن لەبان کادرەیل پەروەردەی وەلایەن بەشیگ لە کەسیل تیەێد ک لەڕی وڵ بوینە و دەروینیان نزمە، ک وە پیرووزی مامووستا و پایەی لەناو کۆمەڵگا نیەزانن، وتیش: پارێزگای زیقار بەشە گەورەگە داشت لەی دەسدرویژکردنە، ک ٨٩ دەسدرویژکردن لە ساڵ گوزەشتە توومار کرد.

سودانی لە قسەیلی ئەرا ئاژانس شەفەق نیوز باس گرنگی ئەوە کەێد ک پەنا ئەرا چارەکردن هووزانە نەوریەێد، باوجی بایەتە پەنا وە یاسا بووڕیەید، و دیاری کرد ک بەشیگ لە مامووستایل خوەشیان لە چارەکردن هووزانە تیەێد، ئەراوە ئازادی و ویرەداری دریا دووارەبوین ئیجویر رویداویگ.

و ئەوەگ لە پەلامار و دەسدرویژکردن لەبان کادرەیل پەروەردەیی زیای کەێد، خوەی رازیبوین بەشیگ لە مامووستایل و کادرەیل پەروەردەس ک وەپویل واز لە ماف خوەیان لەو دەسدرویژکردنە بارن، وەگورەی قسەی زینە حەمدانی خانمە وەڕیەوبەر مەکتەو "ئەلنجاح".

زینە خان لە قسەیلی ئەرا ئاژانس شەفەق نیوز وت: گرنگە وە شیوەیگ ئیدارەیی رەفتار وەگەرد ئەو کەسە بکریەێد ک پەلامار داگە، چ خاوەن حەق بویە یا نەویە، و گووش لەلی بگریەێد، تا تویڕەیی سەردەو بوود، و تەقەلای بەێد گیچەڵەگە گەورەو نەوود.

دووپات لە گرنگی مورشد پەروەردەیی کرد لە چارەکردن گرفتەیل وەڕی کۆڕ هوشیاریکردن باوان و خوەنەوارەیل، وتیش؛ بەشیگ لە پاسەوانەیل مەکتەوەیل هەناێ پەلاماریگ یا دەسدرویژکردن لەبان کادرەیل پەروەردە بوود، دەس نیەنەوەر، لەڕخ رسوومەیل هووزانە، یا لە رخ توڵەسەنین.

مەکتەو ناسکترین میرگە لەناو کۆمەڵگا

 حەیدەر بەیاتی پسپۆڕ پەروەردەیی ڕویشێد: مەکتەو بویەسە ناسکترین میرگ لەناو کۆمەڵگای عراق، لەوەر مقیەتینەکردنی وەلایەن وەزارەت پەروەردە و هەمیش لە وەزرات ناوخۆ، و بایەتە هاوکاری ناوبەین ئەو دوو وەزارەتە بوود وە داناین پاسەوانەیل ئەرا مقیەتیکردن کادرەیل پەروەردە و خوەنەوارەیل و بینای مەکتەوەگە.

ئەرا ئاژانس شەفەق نیوز وتیش: گرنگە بڕوایی و دڵنیایی ناوبەین کادرەیل پەروەردە و کۆمەڵگا و هەمیش وەگەرد خوەنەوارەیل دروس بوود.

یاسای مقیەتیکردن مامووستایل

مادەی ٥ لە یاسای مقیەتیکردن مامووستایل شمارە ٨ ئەرا ساڵ ٢٠١٨، سزای ٣ ساڵ زیندانی و ٢٠ مەلیۆن دینار باج خەێدە بان هەرکەسیگ دەسدرویژی لەبان مامووستا بکەێد، وەگورەی قسەی پسپۆڕ یاسایی عەلی تمیمی.

تمیمی لە قسەیلی ئەرا ئاژانس شەفەق نیوز ئویشێد: گیچەڵ لە سزاگە یا دەق یاساگە نییە، باوجی جیوەجیکردن یاساگە گرنگە ک یەکسانی کۆمەڵایەتی لەلی پەیا بوود، وتیش کارەگە هوشیاریکردن چەن لایەنیگ خوازێد، جویر پیاوەیل ئاینی و راگەیانن و خود مەکتەوەیلیش.