شەفەق نیوز/ رووژنامەی «تایمز ئۆف ئیندیا»ی هیندی، ئاشکرای تووڕیگ کرد قاچاخی هاوردن ژن لە وڵات هیند وەرەو عراق کەن، دویای خەڵەتاننیان ک گوایە ئوەسا لە شار دوبەی ئیماراتی کار کەن.
رووژنامەگە لە راپۆرتیگ ئاژانس شەفەق نیوز وەرگێڕانی کرد وت: دەسەڵاتە ئەمنیەیلە لە وەلایەت بنجاب هیند ئاشکرای ئەو تووڕە کردن، و پۆلیس شار غوا دەسگیر «جەبار مەڵا» کرد ک توومەتی وە قاچاخکردن ١٢ ژن هیندی وەرەو عراق، دویای دادکردنیگ لە پۆلیس لەو باوەتە ک یاسای کۆچبردن و قاچاخی شکنێد.
وەگورەی رووژنامە هیندیەگە ، وەزارەت كاروبار دەیشت هیند خەوەردار بوی ک ئەو ژنەیلە وەرەو بەغداد قاچاخی کریانە، وەبی تومارکردن ناوەیلیان لە فەرمانگەی کۆچبردن، و بندرس کارەگە ئەوە نشان دا ک پارەکە «جەبار مەڵا» ژنەیلیگ خستیەسە کار گوایە لەماڵەیل کار کەن، و بایەت ئەرا کارکردن چگنیان وەرەو شار دوبەی ئاسانەو بکەێد.
وەگورەی راپۆرتەگە؛ جەبار مەڵای قاچاخچی لە ری ناره‌سمی ئەو ژنەیلە رەد کردگە و رەسانەیانە عراق ک ناچاریان کردیه ئەرا وەختەیل دریژیگ کارەیل سەخت بکەن.
یەکیگ لەو ژنەیلە دەرفەت وایین ئەرای پەیا بویه، و داوای دەسمیەتی لە باڵیۆزخانەی هیند لە بەغداد کردیه، و شوی یەکیگ لەو ژنەیلە ك پەنا وە پۆلیس هیند بردیه وت: ژنەگەی کەفتە وەر خەڵەتانن ئه‌ڕا کارکردن لە عراق.
راپۆرت رووژنامە هیندیەگە نشان دا ک توومەتبارەگە وەگورەی یاسایل وەزارەت كاروبار دەیشت هیند ، مووڵەت فەرمی وەدەسی نییە تا کەسەیلیگ لە دەیشت وڵات بخەێدە کار.
پۆلیس بانگواز کرد ک هەر کەسیگ بخوازێد کار لە کۆمپانیایل کارکردن لە دەیشت بکەفێدە دەسی، وەرجەیە وەگەرد لایەنیگ تر بکەفێدە ری بایەدە بزانێد ئایا ناوی لە فەرمانگەی كاروبار دەیشت هیند نووسیاگە.