سایتە ئەمریکیەگە لە راپۆرتەگەی ک ئاژانس شەفەق نیوز ئەڵگەردانی کرد وت: لە قات بانین لە کارخانەی تەماکوو کوینەیگ، تارا عەبدولڵا شوینیگ ئەرا خوەی گردیە، کار لە تابلۆیلی وە کڕەیل سیا و بوور و پیتەیل کوردی و نەخشەکاری کەێد، و داوای وەخشین لەو تەڵەیل کارەبا و قوتەیلە رەنگە ک لەو ناوە کەفتنە.

شار ئەدەب

راپۆرتەگە لە زوان تارا عەبدولڵا ئویشێد: ئەو ستودیۆ ک ١٠ ساڵ لەناوی کار کردیە شوین خەونەیلی بویە، و گشت چشتیگ جویر بەشیگ لە تووڕ گەورەیگە تەقەلای جیوەجیکردنی دەێد. 

راپۆرتەگە وتیش: سلێمانی هەمیشە وەپی ئویشن "پایتەخت روشنهویری" هەرێم کوردستان، ک وەگورەی پەیمانەیل هەرێمی سلێمانی شاریگ کەنجە، م لە ساڵ ١٧٨٤ دامەزریاگە، و شاعر و میوزیکژەن و بازرگان و چالاکوان سیاسی ئەرای هاتن.

راپۆرتەگە وتیش: لە ساڵ ٢٠١٩ وەلایەن یونیسکۆ جویر شار ئەدەب دریا قەڵەم، و دیارە ک بازاڕی گورجە، و ناوڕاس شارەگە پڕە لە سەیرانگە، ک هیلێد بوودە شاریگ زنی و نەمر.

 ئویشێدیش، ئیرنگە سلێمانی جویر شوینیگ سەرەکیە ئەرا شیوەکار و پەیکەرساز و گرافیک ک سوود لە پیشانگا و ستۆدیۆ و بەرنامەیل ڕاهێنان گرن و کارەیلیان نمایش کەن.

سەختیەیل گەورەیگ

راپۆرتەگە لە زوان شیروان کان هونەرمەن  دامەزرێنەر ئاژانس "Paia" ک جویر تووڕیگە ئەرا وەڕیەوبردن کاروبار، وت: کار رەنگینیگە، سلێمانی وەچەو ئەو ناوچەیل عراق، لە هونەر سەردەمیانە خاسترە، و سیماگە ها گەشەکردن چوینکە گەنج و چالاکی فرەیگ هەس.

باوجی راپۆرتەگە وتیش؛ بایەتە هونەرمەنەیل شارەگە بکەفنە وەر سەختیەیل گەورەیگ، جویر تیکڵانەوین وەگەرد جەماوەر گشتی، و سەختی دابینکردن سپۆنسەر، وەگەرد دژایەتی لایەنەیل پارزێگەر لەناو کۆمەڵگا.

 راپۆرتەگە وتیش: شارەگە وە ناوەندیگ روشنهویری ناودیارە، وەلێ ری درویژیگ کەفتیەسە ناوبەین کۆمەڵگای هونەری و مەردم ئاسایی.

راپۆرتەگە لە زوان شیروان کان ئویشێد: ئەگەر جەماوەر گرنگی وە کارمان نەیاگە، دی ئەڕا هونەرمەن گرنگ بوود؟.

هەڵمەت کارخانەی روشنهویری

راپۆرتەگە باس وەدەسهاوردن بەشیگ لە پیشکەفتن لە ساڵەیل دویایین کرد، ک لە ساڵ ٢٠١٩  دەسکریا هەڵمەتیگ وەناونشان کارخانەی روشنهویری، لەناو کارخانەی تەماکوو گەورە، وتیش: جەنگیگ کریا تا ئەو پڕۆژە جیوەجی بکریەێد، چوینکە بیناگە کەفتیەسە بان زەوییگ گران بەها لەناوڕاس شارەگە، و مقاولەیل بازرگانی چەویان هابانی، و ئیرنگە شوین ئوستودیۆ هەس، و بەرنامە ئەرا دیزاین پڕتاڵ و پەیکەرسازی هاناوی.

 راپۆرتەگە دیاری کرد ک دامەزرێنەر و ڕێکخەر پیشانگای ئیستا گەلەری دارا ئار ئەولی وەناوزناو (دارو)ە، ک پیشانگاگەیش ها ناو کارخانەی تەماکووەگە، و گەشبینە وە توانای پڕەوکردن چووڵیەگە وەرد جەماوەر، وتیش: هونەرە جوانەیل هەمیشە کەمیگ لە جەماوەر دویرە، وەلێ ئیمە تەقەلا دەیمن گردیانەو بکەیمن.

 وتیش: زیاتر لە ٨ هەزار کەس لە پیشانگای دویایین ئامادە بوین، لەناویان لە ٥٦ مەکتەو ناوخوەیی سەردانی کردن.

دارا ئەولا دیار کرد ک شانازی کرد ک جاران هەمیشە وەگەرد مەکتەوەیل پەیوەندی داشتیمن تا داوا لە مامووستایل بکیمن خوەنەوارەیل بارن، وەلێ ئیرنگە رووژانە خوەیان وەتەنیا تیەن.

دروسکردن روومانەیل وینەدار

وەگورەی راپۆرتەگە، ئاژانس "Paia"  ک شیروان سەرپەرشتیاریی کەرد، بینای شوین نوویگ کردیاد، و مەلەوانگەی کوینە لەناو شارەگە کەێدە پیشانگایگ هەمیشەیی و جویر ناوەندیگ گۆمەڵگایی، و هەمیش ئامادەکرد ئوستۆدیدیگ ئەرا بەرهەمکردن روومانەیل وینەدار.

راپۆرتەگە وتیش: بەشیگ لە هونەرمەنەیل تەقەلا دەن ئی بۆشاییە ناوبەین هونەرمەن و مەردم پڕەو بکەن.

وتیش: پڕۆژەی دویایی تارا عەبدولڵا پیشکەشکردن کاریگ هونەریە لە شوینەیل گشتی لە سلێمانی و رانیا و هەڵەبجە و چەمچەماڵ، و لەی کار هونەریە، دەنگ ژنیگ پەخش کریەێد ک باس زیانەیل نوای ژن و دویەتەیل لەناو کۆمەڵگای کوردی کەێد.

راپۆرتەگە لە زوان تارا عەبدولڵا وت: خوازم کار هونەرییم وەگەرد باوگم بکونجیەێد، ک کراکاریگ بیناسازییە، و وەگەرد داڵگمیش ک هەمیشە ها بن ماڵ، و وەگەرد کەسەیلیگ لە مەردم، نەگ تەنیا ئەرا ئەو هونەرمەنەیل.

راپۆرتەگە دەسنشان کرد ک کار فرەیگ ها نوای ئەوەگ بخوازێد بۆشایی ناوبەین هونەرمەن و مەردم پڕەو بکەێد، و لە زوان خانمە هونەرمەن رەبین حەمەرفق وت: سلێمانی هویریگ گشتی لەباوەت هونەر راسی نەیرێد، وتیش: بەشیگ لە گەڕەکەیل لە ماوەی ١٠ یەک پیشانگا نەیاشتنە، دی چوین چەوەڕی بکەێد مەردم روشنهویری بفامن؟.

 راپۆرتەگە لە زوان دارو وتیش: ئیمە فرە کەفیمنە وەر رەخنە، چوینکە خوازیمن سلێمانی بکەیمنە شوینیگ کونجیاگ ئەرا هونەر.

سپۆنسەرکردن

هەرلیوا، راپۆرتەگە باس سەرچەوەیگتر ئەرا نیگەرانی هونەرمەنەیل کرد، ک دابینکردن سپۆنسەرکردن پڕۆژەیلیانە، وت: جاروبار بەشیگ لە سەرچەوەیل پاڵپشتیکردن ناوخوەیی کەفێدە دەس، وەلێ سپۆنسەر لە حکومەتەیل بیگانە یا ریخریایەیل نا حکومەتی دەور خاسیگ رانێد، هەکاتی ئەوەگ پەیمانگەی گوتە و پەیمانگەی فەرەنسی پیشکەشی وە پیشانگایلە هەرێم کوردستان کەن.

 باوجی شیروان وت: ئی لایەنەیلە سپۆنسەرکردن ئەرا دروسکردن ئاشتی و پڕۆژەیل مرۆیی دیرن، ئەراوە ئیمە ئەوەگ خوازیمنەی دروسی نیەکەیمن، باوجی پڕۆژەیگ وەگورەی خوازین خاوەن سپۆنسەر کەیمن، و یەیش کاریگەری بەدیگ لەبان سیمای روشنهویری دیرێد.

راپۆرتەگە وتیش؛ پاڵپشتیکردن ناوخوەیی سەرچەوەیگە تەنیا هابان بازنەیگ بویچگ لە وەخشندەیل و کەسایەتیەیلیگ پەیوەندی وە حزبەیل سیاسی دەسەڵاتدار دیرن.

وتیش: هونەرمەنیل هەس جیاجیا لەباوەت پاڵپشتیکردن پڕۆژەیلیان لە لایەنەیلیگ حزبی داشتن، ئەوەیش لەڕخ تیکڵابوینیان لەناو پڕۆژەیگ سیاسی ک خوەیان دەسەڵاتیگ لەبانیان نەیرن.

دەنگەیل تونەڕەوی

وەگەرد ئی سەختیەیلە، هونەرمەنەیل سلێمانی کەفنە وەر ناڕەزایی لە کار هونەریان لەلایەن کەسەیلیگ ئاینی ک دەنگیان لەناو هەرێم کوردستان بەرزترەو بەی، و رەخنەگردن لە سیمایل هونەری وەکار تیارن تا دەنگ و پشتگیری جەماوەر بکەفێدە دەسیان.

لەی باوەتە، راپۆرتەگە وت: هیزەیل ئاسایش وەزوی کارەیل هونەری تارا عەبدولڵا لەباوەت تونوتیژی لەبان ژن وسانن، ئەوەیش دویای بەرزەوبوین دەنگ رەخنە و ناڕەزایی لەناو چینەیل ئاینی و پیاوسالاری.