راپۆرتەگە وت: دەسلەکارکیشان محمد جەواد زەریف لە پۆستەگەی جویر جیگر سەرۆک ئیران ئەرا کاروبار ستراتیژی، بویە  سەرسامییگ لەناو مەیدان سیاسەت ئیرانی، وەتایبەت ئەرا چاکسازیخواز.

ئەو دەسکیشانە رخیگ لە گلەوخواردن ناڕەزایەتیەیل دروس کرد، کە زەریف قایمترین هاوکار پزیشکیان بوی لە هەڵمەت هەڵوژاردنی، کە وەیەکەو ئومیدیگ نشان دان ئەرا زنیکردن چاکسازیخواز وەرانوەر بزووتنەوەی کوینەپەرس لەلای ریبەر باڵای وڵاتەگە، عەلی خامەنەئی.

پسپۆڕەیل کاروبار ئیرانی، لە کومێنتیان لەبان سایت سمایل نیوز، وتن: ئی دەسکیشان ناکاویە نشانەس ئەرا بیئومیدی چاکسازیخوازەیل وەرانوەر حکومەت پزیشکیان، و بەشیگیان پرسین ئایا دەسلەکارکیشانەگە نشان دەێد کە سەرۆک ئیران لە کەسیگ چاکسازیخواز کەفتە کەس خامەنەئی؟، و ئایا زاڵبوین ریبەر باڵا لەبان حکومەت نوو نشان دەێد؟.

میدیایل ئیرانی جویر (رووژنامەی مەشرق) دویرەوخستن وەرپرسەیل خاوەن دوو رەگەزنامە، یا ئەوانەگ کوڕەیلیان دوو ڕەگەزنامە دیرن لە حکومەت، کە زەریف لەناویانە، نشانەی زووریگ دەێد کە نویسنگەی خامەنەئی لەبان پزیشکیان؟.

راپۆرتەگە وتیش: وسیان زەریف لە پشت پزیشکیان لە هەڵوژاردن، کە پزیشکیان تەنیا کاندید چاکسازیخواز بوی، خاڵیگ خاس دادە پزیشکیان وەرانوەر ئەو پەنج کاندید کوینەپەرسە، هەمیش جویر پەیامیگ بوی ئەرا خوەرئاوا وە ئاڵشتکردن٨سیاسەت دەرەکی ئیران، ئەگەر پزیشکیان بردەو، تا لە بەشیگ باوەت هەرێمی ناودەوڵەتی نەرمترەو بوود.

ئەو کابینە کە پزیشکیان ئەرا پەرلەمان پیشکەشی کرد، بزووتنەوەی چاکسازیخواز لەلی رازی نەوی، کە تەنیا یەی ژن لەناوی بوی، و بڕیگ لە پەرلەمانتارەیل کوینەپەرس لە حکومەت وەرین وەگەردیان بوی.

زەریف زوور کەفتیەسە بانی 

لە دیاریکردن مدووەیل دەسلەکارکیشانەگەی، جەواد زەریف، کە لە ساڵ  2013 تا 2021 وەزیر دەیشت بوی، لەبان ماڵپەڕ ئێکس وت: شەرم کەم چوینکە نەتوەنستم رای پسپۆڕەیل دەسەیل وەرپرس جیوەجی بکەم، ئەرا پەسەنکردن کاندیدەیل وەشیوەیگ پووڕیاگ، و بەشداریکردن ژن و گەنجەیل و بڕەیل بنچینەیی جویر ئەوەگ پەیمانی دام.

وتیش: لە کابینەی نوو ١٩ وەزیر وە دەس خوەی نەهاتنە.

دویای ئەو پۆستە، لەی رووژەگە، زەریف پۆستیگ ترەک داگرد باس لەو گومانەیلە لەبان خوەی کرد، چوینکە کوڕەیلی رەگەزنامەی ئەمریکی دیرن، و دووپات کرد کە خوەی و ژن و مناڵەیلی لە ئیران داکاسیانە، و کەفتیەسە ژیر سزایل ئەمریکی و کەنەدی، کە ئەرای نییە بچوودە ناو ئەمریکا، و ئی گومانەیلە وە کەسیگ کریەێد کە لەناو ئەمریکا بوود.

وتیش: حکومەت کەفتیەسە ژیر زووریگ ئەرا وەکارهاوردن یاسایگ لە ساڵ 2022 دەرچگە، لەباوەت دامەزرانن وەرپرسەیلیگ دوو ڕەگەزنامە دیرن، ئەوەیش جویر دەسپیچگ ئەرا زوورهاوردن وەبان حکومەت، و پەکخستن کارەیلی.