لە راپۆرتیگ ماڵپەڕ“ئیرەم نیوز” هاتیە، عەدنان گڕیگ  دانیشێد و گڕی کەفێدە ریکردن، وە خاک کەناراوەیل کالابریا لە باشوور ئیتاڵیا سزیاس و ساعەت وە ساعەت نووڕێدە دەریا، وە ئومید هاتن  بەلەمیگ لاستیکیی بویچگ کە ژنەگەی بارێد، بەڵام نەڕەسی، چوینکە دەریا خوەی و بڕیگ ترەک خنکان.

"ئەیام نەجم"، ئەو ژن گەنجە تەمەن بیس ساڵە وە گیس سیا لە شار کەرکوک عراقەو، یەکیگ بوی لەو دەیان قوربانییە کە کەفتنە تەڵەی باندەیل قاچاخچێتی ئایەم وەرەو ئەوروپا تا باوەش بکەێدە شویەگەی  کە بڕیار بوی لە دویای چەن مانگیگ چەوەڕیکردن لەبان هاوسەرگیرییە کاغەزییە دویر و درێژەگەیان، چەویان وەیەک بکەفێد.

 لە 10ی حوزەیران، ئەو ژن گەنجە وەناو “ئەیام” سوار بەلەمیگ لاستیکیی بوی، وە یاوەری 76 سەرنشین، کە لە کەناراوەیل تورکیاو کەفتنە ری، بەڵام ئیجارە شوین چگنی وەرەو یۆنان نەوی هەکاتی فرەی کووچبەرەیل نایاسایی لە تورکیاو وەرەو ئەوروپا.

ئەیام بڕیاردا شوین چگنی کوڵبڕەو بکەێد تا لە ئیتاڵیا چەوی بکەفێدە شویەگەی محمد عەدنانی وەبی ئەوەگ وە شوینیگ هشکایی رەد بوود کە کووچبەرەیل  هەزاران کیلۆمەتر وەپا بڕن، تا بڕەسنە شوین خوەیان لە ئەڵمانیا و ئیتاڵیا و وڵاتەیل د ئەوروپا، خوەیان خەنە وەر رخ وەشوینکەفتن لەلایەن پولیس سنوور لەو وڵاتەیلە کە وەپییانەو رەد بوون.

 قوربانییەگە “ئەیام”، پەنج رووژ لە دەریا وەگەرد چوار کەسوکاری وەسەر بردن، شەپوولەیل دەریا چەپ و راس وەپی کرد، وەرجە ئەوەگ بەلەمەگە وەناکاوەو بسزێد، لە ١٥ی حوزەیران، کە بویە هوکار نوقمبوینیان لە دەریای ناوڕاس، کە ١٣٩ کیلۆمەتر لە کەناراوەیل شار ڕۆسێلا یونیکا لە ناوچەی کالابریا لە ئیتاڵیا دویرە.

یەکیگ لە کەسوکارەیل قوربانییەگە لەو رویداو پڕ لە ئازارە ڕزگار بویە، بەڵام لەوەر بەدی بار تەندروسیی نەتوەنست تەواو چیرووکەگە ئەرا خیزانەگەی و کەسوکاری بویشێد، بەڵام توەنستیە ئەرا  محمد عەدنانی بویشێد کە دەزویرانەگەی کە چەوەڕیی کەێد، قورتار نەویە، و هەر لەور چەوی  خنکیا.

بنەماڵەی قوربانییەگە، “ئەیام”، وە دانان چادر پرسە لە ناوڕاس شار کەرکوک، لە خەم و خەفەت ئەرا دویەتیان، کە تا ئیسەیش وەگەرد ٣٣ کەس ترەک تەرمەگەی دیار نییە، لە دەر ئەو چادر بویچگە، وە دڵ شکیای، خیزانەگەی وسیانە، بیجگە لە ئەسر رشانن هویچیگ ترەک وەپییان نەکریا، بەشکی ئەو ئەسرە بڕەسێدە ئاوەیل دەریای ناوڕاس تا کەمیگ لە یادەوەرییان گلەو بەێد.