شەفەق نیوز/ هەرچەن پێشکەفتن تەکنۆلۆژیا وەتایبەت لە پەیوەندی، خزمەتەیل گرنگ داگە ئایم تا بویە بەشیگ لە نیازو رەفتارەیل رووژانە، وەلێ هەمیش بویە هووکار چەن بیمارییگ دەروینی و لەشی، و گرفتەیلیگ کۆمەڵایەتی.
بازی و پڕۆگرامەیل رەنگاوڕەنگ لەناو مۆبایل و کۆمپیوتەر مناڵەیل وە گشت تەمەنیان وەی جهان خوەیانە کیشانە، و خستەیانە وەر مەترسی دەروینی و تەندروسی و کۆمەڵایەتی و رەوشتی.
خیگردن تەکنۆلۆژی
دکتۆر ئەحمەد سەراجی پسپۆڕ زانست دەروین ئەرا ئاژانس شەفەق نیوز ئویشێد: خیگردن مناڵەیلە لەبان ئامێرەیل ئەلیکتڕۆنی وەگەرد پڕۆگرامەیل و بازیەیلە شایەت بوودە جی سەرەکی سەرقاڵی پسپۆڕەیلە وە چەودیریکردن تەندروسی دەروینی و لەشی مناڵ لەی ماوە.
وتیش؛ تەکنۆلۆژیای نوو ئیسە ک وەزاڵی خوەی چەسپانیەسە ناو کۆمەڵگایه‌یل جووراجور ، بویە مەیدانیگ ئەرا زانست و شارستانی، و لە خود وەختەگە بویەسە مەیدانیگ ئەرا دویاکەفتن و ملهڕی سرووشتی.
وتیش؛ ئی باوەتە پەیوەندی وە داڵگ و باوگەیل دیرێد، و ئەرکیان ئەوەسە ک چەودیری مناڵەیلیان بکەن هەنای مۆبایل و کەمپیوتەر وەکار تیارن، ک بەرنامەیل خراویگ هەس زەرەد وە تەندروسی مەغز دەن، بازی «پۆبجی» - ئەرا نموونە - هەس توندڕەوی وەشیوەی گەورەیگ لەلای مناڵەیلە پەیا کەێد، و پڕۆگرام «تیک تۆک» نموونەیگە ئەرا سووکی رەوشت و کۆمەڵایەتی.
سەراجی وتیش؛ ئی پڕۆگرام و بازیەیلە بوینەسە قوڵنگەی رمانن کۆمەڵگاگە، و ریگریگ لە نوای دروسکردن نەوەیگ كه‌ن ک خاوەن رەوشت باڵا بوود، ئەراوە تەمەی باوگ و داڵگەیلە کەیمن وەخت مناڵەیلە رێک بخەن و رینمای خاس لەی بازیەیلە نشانیان بیەن ک توانای مەغزییان فرەوە بکەێد، و بازیەیلیگیش هەس کارکردن مەغز وەخاتر بیناکردن لەش مناڵەگە و حانەیل مەغزی خاسەو کەن.
بیماریەیل رەخبەر
لەلای خوەییش خانمە دکتۆر مەها سەگبان ئەرا ئاژانس شەفەق نیوز ئویشێد: گرنگترین ئەو مەترسیەیلە ک مناڵەیلە لە مەوقەی وەکارهاوردن ئامێرەیل مۆبایل و ئایپاد کەفنە وەری، لەشی و دروینیە. ودیاری کرد ک مەترسیەیل لەشی لە دانیشتن ئەرا ماوەی فرەیگ وەبی جوولەکردن تیەێد ک بوودە زەرەد و توانای نووڕستن کەمەو کەێد.
وتیش؛ فرە لە مناڵەیلە خوەیان تەنیا ئەو ئامێرەیل زیرەکە وەکار تیارن، و یەیشە هیلێد هووکارەبوینی یەواشەو بوود، و نێخوازێد وەگەرد ئەوەکەیلە تیکڵا بوود، و جاروباریش بیماری دەروینی «تەوەحد» پەیا کەێد.
سەگبان هووشداری کرد ک فرە لە مناڵەیلە چنە ناو بازی و مەسجەیلە تا ئەوەنە رەفتارەیل لەش خەنە پشتگووش ک شیواشیویگ کەفێدە ناوزگیان و شایەت میز بی هووشی بکەن.
سەرقاڵی خاوەن
داڵگ مەریەم، خاوەن چوار مناڵە، سەرقاڵی خوەی وە کار ناو ماڵ وکەمی وەختەگە کەێدە دەسپیچگ ک هیلێد مناڵەیلی ئەرا ماوەی فرەیگ مۆبایل وەکار بارن.
و ئەرا ئاژانس شەفەق نیوز ئویشێد؛ من سەرقاڵ کار ماڵ و کار دەیشتم، چوینکە شویەگەم بیکارە، و هەمیش رخم لەبان مناڵەیلەم چوود نەگ هەنای لەماڵ دەرچم ئەوان پەیوەندی وەرد برادەرەیلیگ بکەن ک ئەرام ناسیاگ نیین، ئەراوە من ناچارم وەیە.
برادەر و مامووستای ئەلیکتڕۆنی
روسول، دوێەت مناڵیگە لە تەمەن شەش ساڵان، ئەرا ئاژانس شەفەق نیوز ئویشێد: هیچ خوەشک و برا نەێرم، و باوگ و داڵگم فەرمانبەرن، و کەسیگ نیە وەختەگە وەردی بوومە سەر، ئەراوە خوەشم تیەێد مۆبایل وەکار بارم، تاقەت خوەم دەرکەم، و هەمیش خوەنستنەگەم وەگەرد خانمە مامووستاگەم (مامووستا ریتاج) لەبانی جیوەجی کەم، ک وەرجە دەسکردن وە ساڵ خوەنستنەگە، خوەنستن پۆل یەک بنەڕەتی وەپیمان دەێد.