رووژنامەی "جروسەلم پۆست" ئیسرائیلی، لە راپۆرتیگ کە ئاژانس شەفەق نیوز ئەڵگەردانی کردیە، ئویشێد: "هەرێم کوردستان وەشیوەیگ سەرەکی لە ساڵ 2017 بەشداری کرد لە شکستهاوردس وە داعش، ئیرنگەیش ئارامی و ئاسایشی بەهرەمەنە تا رادەیگ دەرفەت ئابووری و بەرهەمهاوردن و گەشتیاری دیرێد".

رووژنامە ئیسرائیلییەگە وتیش: بەڵام سروشت خوسەی لە بۆشایی تیەێد، و هەر ئەرایە فرە لە هاوسایل هەرێم ئیرەیی لە سەرکەفتن هەرێم کوردستان بەن، و تەقەلای شیوانن ئەو هەرێمە دەن.

لە راپۆرتەگە باس لە "زنجیرە رویداوەیلیگ لە چەن رووژ و مانگەیل گوزەشتە کریایە، کە جویر هەڕەشەیگە لەبان هەرێم کوردستان، لە وەختیگ هەرێم دابەشبوین لە ناوەین هەردوگ لایەن سەرەکی پارتی دیموکراتی کوردستان و یەکێتی نیشتمانی کوردستان دیرێد."

وتیش: "پارتی دیموکراتی کوردستان وە وەهازترین و باڵادەسترین لە هەولێر دانریەێد، هەرلیوا بەهرەمەنە لە پەیوەندی دووسانە و قایمیگ وەگەرد ئەنقەرە، هەرلیوا جویلەی بازرگانی و دارایی لەودیم سنوورەو. بەڵام یە نەویە مدوو ئەوە کە ئەنقەرە دەسوە هەڵمەتیگ سەربازی لە باکوور نەکەێد کە فرەجار زیان وە کورد رەسنێد". 

 تورکیا و ئیران

لە ڕاپۆرتە ئیسرائیلیەگە باس ئەو  کریایە کە تورکیا ئویشێد جەنگ پەکەکە کەێد، کە وە "تیرۆریست" دەێدەی قەڵەم، بەڵام گورز و پەلامارەیل تورکیا لەبان ئەندامەیل پەکەکە نیگەران خەڵک مەدەنی کورد و ئەو پیکاتەیل لەناو هەرێم کوردستان کەێد، و وەتایبەتی لە دهۆک و هاوسایلی.

لە خود وەختەگە ئیران هەڕەشەی ئۆپەراسیۆنیگ سەربازی لەبان هەرێم کوردستان دەێد، کە راپۆرتەگە ئویشێد “تەهران پەیوەندی خاسیگ وەرد یەکێتی دیرێد، زیاتر لە پارتی، و زوورەیلی لەبان باڵەیل چەکدار ئۆپۆزسیۆن ئیرانی زیایەو کردیە، کە بەشیگ لەوە وەگەرد  ساڵڕووژ کوشتن ژینا ئەمینی ئەو دویەت کورد ئیرانە گریە بەسایە.” 

 زوورەیل بەغداد

 لە خود وەختەگەیش، راپۆرتەگە دەسنشان کەێد کە “هەرێم کوردستان کەفێدە ژیر فشارەیل بەغدا”، وتیش؛ “یەیش رخیگ لەبان کورد لە کەرکوک دروس کەێد، کە هیزەیل فیدراڵی لە ساڵ 2017 کۆنتڕۆڵی کردن، یەیش بیجگە لە هەڕەشەیلیگ پەیوەندی وە بودجە و چشتەیلیگ ترەک .”

وتیش؛ "هەرێم کوردستان گشت ئەرکەیلی جیوەجی کرد و وە شەفافیەتیگ تەواو رەفتار وەگەرد بەغدا کرد، ئەوەیش لەلایەن نێچیروان بارزانی سەرۆک هەرێم دووپاتی کرد".

وەگورەی راپۆرتەگەی ئیسرائیل، لەوەر رووشنایی گشت ئی هوکارەیلە وەیەکەو، هەولێر کەفێدە نوای سەختی گەورەیگ لە پەیوەندییەیلی وەرد بەغدا و لەباوەت فشارەیل ئیران و تورکیا، دەسنشان کەێد کە ئەمریکا و هیزەیل خوەرئاوا فرەجار لە گوزەشتە پاڵپشتی هەرێم کوردستان کردنە، هەرلیوا هەرێمیش پەیوەندی ئابووری وەگەرد وڵاتەیل خەلیج دیرێد، وەگەرد ئەوەیش هەرێم کوردستان لە باکوور عراق گیر بەسایە، و جویر پەنجەرەیگ ستراتیژی کار کەێد کە ئیران و تورکیا و بەغدا هانە دەوری.

لە کۆتایی راپۆرتەگە هاتیە، "ئەمریکا هەرێم کوردستان وەکار تیەرێد ئەرا دابینکردن هیزەیلی لە خوەرهەڵات سوریا، هاووەخت ئیران و تورکیا بویین سەربازی ئەمریکا لە سوریا وە جویریگ نشان دەن، چماێ خوازن زوور بخەنە بان هەولێر، چوینکە چەن دامەزراوەیگ ئەمریکی کەفتنەسە نزیک هەولێر پایتەخت هەرێم کوردستان و لە فڕۆکەخانەگەی”.

 ئەڵگەردان: ئاژانس شەفەق نیوز