شەفەق نیوز/ دویای پویچەڵکردنی ئەرا زیاتر لە ١٨ ساڵ، خزمەت پابەندکردن سەربازی و خزمەت پەرچەم، وە زاقی تیەێدەو ئەرا سیمای عراق،  و ئی کارە لەڕی بڕیاریگ حکومەتی، وەتایبەت دویای رەوانەکردن پڕۆژەی یاساگە ک ئەنجومەن وەزیرەیل دەنگ لەبانی دا وەرەو ئەنجومەن نوێنەرەیل، تا تەوەرەیلی باس بکریەێد و بکەفێدە پای رەزامەنی لە ژیر گومەزی پەرلەمان، و لەبان هاووڵاتییەیلە جیوەجی بکریەێد.

وەرجەیە، لە رووژ سێشەممە ٣١ ئاب ٢٠٢١، ئەنجومەن وەزیران لە دانیشتن هەفتانەی  واژوو لەبان پڕۆژەی یاسای خزمەت پەرچەم کرد ک ئەنجومەن سڵای دەوڵەتەگە ووردبینیی کرد، و ڕەوانەی کردە ئەنجومەن نوێنەرەیل، و بەیاننامەگە زانیاریەیلیگ زیاتر دەربارەی پڕۆژەی یاساگە ئاشکرا نەکرد، و چەوڕیکریاگە ئەنجومەن نوێنەرەیل لە دانیشتنەیل هاتگی گفتوگۆ لەلی بکەێد.

لەلاییگ تر، موستەفا کازمی سەرۆک حکومەت عراق، لەبان تویتەر نووسان: پڕۆژەی یاساگە ئەنجامیگە ئەرا پەیمانەیل حکومەتەگەی لە مەوقەی وەرگردن وەرپرسایەتی لەوەردەم گەلەگە، وتیش؛ بڕیاردان خزمەت پەرچەم ئەوەسا ئەرزشەیل نیشتمانی لە رزەیل گەل عراق چەسپنێد.

لە وەختیگ گوزەیشتە، دەسەی ئاسایش و وەرگری پەرلەمانی مەزەنە کرد ک پڕۆژەی یاسای خزمەت پابەندی بکەفێدە ساڵ ئایندە لەوەر سەرقاڵی نۆێنەرەیلە وە پرۆپاگەندەی هەڵبژاردن.

چەنەو باس فراوانیگ

هاووڵاتییەیلیگ وتن ئی پڕۆژە وەگەرد رژیم دیموکراتی نێگونجیەێد، کەسەیلیگ تر جوور بڕیار خاسیگ ئەرا پەیاکردن ئەو هاوسەنگیە ک لە سیستەم سەربازی لەی ساڵەیل گوزەیشتە لە چین مەزهەبی و پێکهاتەیی گوما بویە، ک شایەت وەخاسی گلەو بخوێدە بان کۆمەڵگاگە.

«ئیرنگە، هەر پێکهاتەیگ سوپای خوەی دیرێد » وەی قسەیلە خانمە هاووڵاتی رەند محمد باسەگەی ئەرا ئاژانس شەفەق نیوز کرد ک وت: ئی پڕۆژەی خزمەت سەربازیە ئەوەسا گشت پێکهاتەیلە خەێدە ناو دامەزراو سوپای، و ئەوەسا لە خوسەی کەسایەتی کەمەو کەێد و هەس وە یەکێتی نیشتمانی زیای کەێد.

سەرکردەیلیگ نیشتمانی

لە ساڵ ٢٠٠٣، هەنای عراق ئیسە دیرێد تووز جەنگەگە تەکنێد ک سیستەم سەربازیی فەوتان، یەکەم بڕیارەیل دەسەڵات هاوپەیمانی وەختانەی ئەو مەوقە وە سەرپەرشتیارەی پۆڵ بڕێمەر ئەوە بوی ک تەجنید پابەندی لە وڵاتەگە پویچەڵ کرد، و پەک گشت سوپا و دامەزراوە ئەمنیەیلە خست.

باوجی ئمڕوو، دیارە ک سەرکردە سەربازی و ئەمنیەیلەی عراق راییگ تر دیرن، ک لیوا روکن (ع،ن) پشتگیری لە بڕیار خزمەت پەرچەم کرد و وت: ئەوەسا هیلێد گەنجەیلە هووکارەی سەختی بوون، و هەمیش سوودەیلیگ تر هەس ک بایەتە گشت تاکیگ لە وڵاتەگە رێز لە خزمەت پەرچەم بگرێد.

 (ع،ن) لە قسەگەی ئەرا ئاژانس شەفەق نیوز دەسخوەشی لە پڕۆژەی یاسای خزمەت پابەندی کرد و وت: پیاوەیلیگ پاڵەوان دروس کەێد و بیکاری لەناو دەێد، و سەربازەگە هووکارەی یاسا و سەبر بوود، و ئیجا ئی یاسا خاسیەیل گەورەیگ دیرێد.

پسپۆڕەیلیگ یاسایی

عەلی بەیانی پسپۆڕ لە ماف مرۆڤ ئویشێد: یاسای خزمەت پابەندی ناچار هاووڵاتی کەێد لەبان یەک کار دیاریکریاگ، ک یاسای ناودەوڵەتی قەیەغەی ئەوە کەێد، جوور کاریگ زوورکاری.

بەیاتی لە قسەکەی ئەرا ئاژانس شەفەق نیوز وت: ئامانجەیل پڕۆژەی یاساگە وەگەرد بنەمای ماف مرۆڤ نەگونجیاگە، و سەربازکردن کۆمەڵگاگە ک سیمای عراقی وەخوەی دوینێد، خوەی شمارەی فرەس و نەبایەت زیاتر بخوازێد.

وتیش؛ تەجنید ناچاری ئەرا هەر هاووڵاتییگ وەگورەی بڕوانامەگەی، ک خاوەن بڕوانامەیلە تا ماوەی دوو ساڵ سەربازی کەن، و ئی ماوە بەش نێکەێد تا بڕوای سەربازی لەلای سەربازەگە پەیا بوود، بەڵکم پشتبەسان وە سیستەمیگ ئەمنی و سەربازی دیاریگ، ئازادی دەێدە هاووڵاتی تا روی وەی دامەزراو سەربازیە بکەێد و ئامادەیی خاسیگ ئەرای بوود.

بەیاتی لە کۆتایی قسەیلی وت: رێزگردن لە ماف مرۆڤ، و دویرەوخستن ئی مافەیلە لە بەشبەشەکی، ئەوە داوا کریاگە، بەڵکم تەجنید پابەندی هەژمارەیلە زیایەو کەێد و دەرەیل گەندەڵی لەی دامەزراوە واز کەێد، و هەمیش دەرەیل دووچەوەکی ئەرا ئەوانەگ توانای پویل داین لەی دامەزراوە نەیرن واز کەێد، و هەر کەس پویل نەیرێد کەفێدە وەر ئی پێشیلکاریە.