ئەو وینەیلە لەلایەن کامیرای "درۆن" ئاژانس شەفەق نیوز گریانە، شیوەی سەختی شار بەغدا نشان دەن، کە لە ریە سەرەکییەیل سەیدیە و دۆرە درویژەو بوود تا رەسێدە مەنسور و جادریە و بەیاع، 

لەری وێستگەی کارەبای دۆرە و چەم دیجلەو رەد بوود. 

 ئی وینەیلە ئەو ئاڵشتکاری وەرچەوە نشان دەن کە لەی ناوچەیل نەختینە بوود، کە جاران وە دار و سەوزایی تایبەتمەن بوین و ئمڕوویش وەدەس ئی پیسبوین ژینگەییە ناڵن.

ئی دیمەنەیلە وینەیگ تاریک پیسبوین ژینگە ئاشکرا کەن، کە  خوەڵوتووز زاڵ بویە و ئاسمان وە ئەور خوەڵ و پیسی پووشیاس، یەیش پایتەخت عراق کردیەسە جویر بیاوانیگ فراوان کە سەوزە و دارستانی لەناوی نییە.

لەی چوارچیوە، فازڵ ئەلغەراوی، سەرۆک سەنتەر ستراتیژی ئەرا ماف مرۆڤ لە عراق، ئاشکرا کەێد کە غاز ماشینەیل زیاتر لە 60% پیسبوین وای بەغدا دروس کەن، کە لە ئەنجام بزوێنەر سزیان  دروس بوود، کە رخیگ گەورە لەبان تەندروسی گشتی دروس کەێد. 

وەرجەیە، غەراوی لە بەیاننامەیگ باس ئەوە کرد کە،  خراوبوین رەوش ژینگەیی بویەسە مدوو بەرزەوبوین ریژەی شێرپەنجە و بیماریەیل هەناسە و ناوزگ، کە عراق وەدەس بڵاوبوین ئەو بیماریەیلە ناڵێد، لە ئەنجام بەرزەوبوین ئاست پیسکەرەیل ئاو.

لەلاییگ ترەک، ئەندام دەسەی تەندروسی و ژینگەی پەرلەمان، باسم غورابی، باس ئەوە کەێد کە عراق لەی دویاییە بەرزەوبوین وەرچەویگ لە ریژەی بیماریەیل پیسبوین توومار کرد، وەگورەی ئەو وتارە کە ئاژانس شەفەق نیوز بڵاوی کردگە.  

دانیشتگەیل ناوچەگە ئویشن؛ پیسبوین ژینگە وەرەو خراوتر چوود، وەتایبەتی لە ناوچەیل باشوور خوەرهەڵات بەغدا، لەناویان دەورگرد شار بیسمایەی مۆدێرن، کە جیماگە و ماددە کیمیاییەیل لەناوی گردەو بوون، یەیش بویەسە مدوو پیسبوین ئاو و دروسبوین نیگەرانی لە تەندروسی دانیشتگەیل و ژینگە.

 عراق لە پلەی دویەم جەهانیە لە روی پیسبوین 

وەگورەی راپۆرتیگ کەناڵ بی بی سی؛ عراق لە پلەی دویەم جەهانە لە پیسبوین ژینگە لەدوای رووسیا و ساڵانە 18 ملیار مەتر سێجا غاز سزنێد. 

 لە راپۆرتیگ ترەک کە ماڵپەڕ نومبیۆ بڵاوی کرد، دەرکەفتیە کە ریژەی پیسبوین لە عراق ئەرا 73.59% بەرزەو بویە، کوالیتی شوینەیل سەوز و پارکەیل وەرەو 38.14% خراو بویە،  و لە راپۆرتەگە رووشنایی خستیەسە بان ئەوە کە پیسبوین وا رەسیەسە 66.99% و پیسبوین ئاو نووشین رەسیەسە 55.50% و ژاوەژاو ئەرا 52.06% بەرزەو بویە.