شەفەق نیوز/ لەی ماوەی گوزەشتە، پەلامارەیل ئیران و تورکیا لەبان ناوچەیلیگ لە هەرێم کوردستان دووارەو بوین، وەسنگ جەنگکردن وەرد ئەو ریخریاگەیل تیرۆریە لەو ناوچەیلە، لەناو رخەیلیگ لە بەرزەوبوین ئاستی لە ماوەی بانان، و بوودە داگیرکردنیگ وەرەو ناو عراق، ئەگەر ئی بیدەنگی حکومەتیە وەرانوەر ئەو دەسدرویژیە بمینێد.
رووژ پەنجشەممەی گوزەشتە، سوپای پاسدران ئیران، راگەیان ک ئەوەسا لە پەلامارەیلی لە کوردستان عراق وەردەوام بوود لەبان گرووپەیلیگ چەکدار سەروە ئۆپۆزسیۆن کورد ئیرانی ک تەهران وە تیرۆر ناویان نەێد.
لە خود رووژەگە، خەڵوسی ئەکار وەزیر وەرگری تورکیا، وەشانن گورزەیلی لەبان شوینەیل پەکەکە لەناو زەوی عراق راگەیان، وەدویری ١٤٠ کیلومەتر لە سنوورەگە، و دووپات کرد ک ڕەنجمان دژوە تیرۆریستەیل وەردەوامە تا لەناوبردن دویاترین "تیرۆریست" – وەگورەی قسەی خوەی-.
نشانەیگ شەرمە لە تیوڵ نەتەوە یەکگرتگەیل و هاوپەیمان ناودەوڵەتی
لەی باوەتە، مەحما خەلیل ئەندامی ئەنجومەن نوینەرەیل عراق لە پارت دیموکراتی کوردستان، شەرمەزار وەردەوامی زنجیرەی گورزەیل تورکیا و ئیران لەبان ناوچەیلیگ لە هەرێم کوردستان کرد، و دووپات کرد ک دەسدرویژیە لەبان سەروەری عراق و هاووڵاتییەیل، و هەڕەشەی ئاشتەوایی کۆمەڵایەتی و ئارامی ناوچەگە دەێد، و وە نشانەیگ شەرمە لە تیوڵ نەتەوە یەکگرتگەیل، و هاوپەیمان ناودەوڵەتی، و هەمیش لەبان رێککەفتن ستراتیژی وەرد ئەمریکا دانادەی.
خەلیل ئەرا ئاژانس شەفەق نیوز ئویشێد: هەر دەسدرویژییگ وە پێشێلکردن زاقیگ لەبان سەروەری وڵاتەگە دریەێدە قەڵەم، وتیش؛ ویرەداری دەوڵەتەیل هاوسا لەبان کوشتن عراقیەیل وەبیباکی چوودەو ئەرا لاوازی حکومەت ئیسە ک ئەو توانای مقەیەتیکردن دامودەزگایلی لەناو بەغداد نەیرێد، ئەی لەکنار وڵاتەگە چوین؟.
خەلیل هەمیش ئویشێد: دەسدرویژی دەوڵەتەیل هاوسا پشت وە دەسپیچگەیلیگ درووکانی بەسن، ک قەیران ناوخوەیی خوەیان ئەرا عراق هەناردە کەن، و دیاری کرد ک ئەگەر حکومەت فیدراڵی وهیزەیل سیاسی نەتوەنستن بڕیاریگ یەکلایی وەرانوەر ئەو پەلامارەیلە بووەن، خو ئەوەسا لە بانان هەر دووارەو بوود، ئەراوە بایەتە چارەیلیگ راسی ئەرا نواگردنی بنریەێد، و لە ئاست ناوخوەیی و ناودەوڵەتی بکەفنە جویلە وەشیوەیل دیبلۆماسی ئەرا نەهیشتن دەسدرویژی لەبان سەروەری وڵاتەگە وکوشتن بیگوناهەیل.
یە ماوەیگە ئیران گورزەیلی وەبان هەرێم کوردستان وەشنێد، سەختترینی ئەوەی رووژ چوارشەممەی گوزەشتە بوی، وە زیاتر وە ٧٠ مووشەک وە فڕکیەیل بێفڕۆکەوان، گرووپەیلیگ کورد ئۆپۆزسیۆن ئیرانی کردە ئامانج.
١٤ کەس لەلای کەمەو کوشیان، ژنیگ دووگیانی لەناویان بوی، وزیاتر لە ٥٠ کەسیش لەی گورزەیلە زەخمدار بوین، فرەیان لە مەدەنی بوین ومناڵ خوار دە ساڵانیش لەناویان بوی.
سوپای پاسدران ئیران، توومتبار کۆمەڵەیل کورد لەناو عراق کەێد، وە پەلامارداین ئیران و دزەکردن ئەرا شیوانن ئاسایش ودروسکردن ئاژاوە لەناو ئیران.
دەسدرویژیکردن "دووانەکی" لەبان سەروەری و دووچەوەکی لە رەفتار
شێروان دوبردانی ئەندام ئەنجومەن نوینەرەیل عراق لە پارت دیموکراتی کوردستان، دووپات لە هەسی کەموکڵی ئاشکرایگ لەلایەن حکومەت فیدراڵی لەڕوی پالامارەیل ئیران وەبان هەرێم کوردستان کەێد، ک بایەت بوی هەڵویست تونیگ بوردیاد، وەتایبەت دویای کەفتن دەیان لە قوربانیەیل مەدەنی و ژن ومناڵ لەو گورز دویاییە.
دوبردانی ئەرا ئاژانس شەفەق نیوز ئویشێد: سەروەری عراق لەلایەن ئیران و تورکیا دەسدرویژی لەبانی کریەێد، وەلێ ئەوەگ نووڕیەێد دووچەوەکی لە رەفتارکردن وەرد ئەو دوو دەوڵەتە کریەێد وەرانوەر پێشێلکردن سەروەری عراق، و ئەگەر هەڵوێست تونیگ لەلایەن حکومەت فیدراڵی بوود، دەسدرویژیەگە وەردەوام بوود و رەسێدە داگیرکردن وەدەسپیچگ پەکەکە، ئەرا داگیرکردن چەن ناوچەیگ لە هەرێم کوردستان و ناوچەیلیگ عراقیتر، و یەسە ک رخمان لەلی چوود.
پەرلەمانتارەگە هەمیش ئویشێد: ئەراوە واژوو زیاتر لە ١١٣ پەرلەماتار گردەو کریا، وەخاتر ئەنجامداین دانیشتنیگ تایبەت لەلایەن پەرلەمان لەباوەت پەلامارەیل ئیران و وەردەوامی دوژمنایەتی لەبان زەویەیل عراق.
حکومەتیگ بی دەسەڵات و لایەنگریەیل حزبی
تۆێژینەرەیلیگ سیاسی بیدەنگی حکومەت فیدراڵی لە پەلامارەیل وەردەوام لەبان هەرێم کوردستان وە تەقەلایگ زاننەی ئەرا گلەوداین هەرێم کوردستان وەناچاری ئەرا بەغداد، هەمیش لەوەر لایەنگری حزبەیل عراق ئەرا دەوڵەتەیل هاوسا.
لەی باوەتە، تۆێژنەر سیاسی سابر ئیسماعیل ئەرا ئاژانس شەفەق نیوز ئویشێد: ئێ حکومەت ئیسە وەختانە وبی دەسەڵاتە، چوینکە حکومەت وەڕیەوبردن کارەیلە، و هەمیش ناکۆکی و گرفتەیل لەناوبەین هەرێم کوردستان و بەغدا لەباوەت نەفت و خاڵەیل گومرگی گیر هاتنە، و بەغداد دوینێد ک شایەت ئەو پەلامارەیلە هەرێم لاوازەو بکەێد، ئیجا ناچار بوود پەنا وەپی بوەێد.
نەجم یەعقوب پسپۆر یاسایی و تۆێژینەر لە کاروبار سیاسەتی ئویشێد: لایەنگری حزبەیلیگ ئەرا تورکیا و ئیران کاریگەری لە هەڵوێستیان وەرانوەر ئەو دوو دەوڵەتە دیرێد، وەگەرد لاوازی دامودەزگایل سەربازی و ئەمنی، و بینانەکردن هیزیگ گونجیاگ ئەرا نواگردن ئەو دەسدرویژیەیلە.
یەعقوب لەڕی ئاژانس شەفەق نیوز داوا لە حكومەت عراق کەێد بڕیارەیل نواگیریگ بوەێد، وە رویکردن ئەرا نەتەوە یەکگرتگەیل و ئەنجومەن ئاسایش ناودەوڵەتی ئەرا داوای ریکارەیلیگ لە روی ئەو دوو دەوڵەتە، هەمیش وە زویکردن لە چارەکردن قەیران سیاسی وە دروسکردن حکومەتی گواستنەوە و جیوەجیکردن چاکسازیەیلیگ راسی ک بتوەنێد عراق ئەرا هاوسەنگی لە ناوچەگە بارێدەو.
هەمیش ئویشێد: بایەتە عراق داوا لەو دوو دەوڵەتە بکەێد قەرەبوو دەسدرویژیەیلیان بکەن وەگورەی یاسای ناودەوڵەتی، و ماف یاسایی وە هاووڵاتییەیل زەرەدمەن بیریەێد.