عه‌لى حسێن فەیلى/ زانيمن ك برێ کەس لە تیەریکی ترسن، ئەوە لە خاسى ياخراوى شەوو تیەریکی نیە! بەڵکم گشتمان لە بيمارى، لە زلزلەو لافاوو دشمنەيل خەياڵ خوەمانيش ترسيمن بى ئه‌وە ك کەسیگ لەلمان بخوازێ يا ناچارمان بكا و یە لە نەتیجەی شیوەی هويرە كردن و پەروەردە كردن مناڵيمانە!
گشت لە سەروەخوەیی و سەروەری مللەت خوەيان و لە بەرزەو بوين ناوو ئاڵاى وڵات خوەیان دڵخوەشن و ئەرای نيشان داين ئى خوەشی و ناخوەشیەیلە هەرکەس رێ و رەوەنێگ ديرێ ك زوان و روخسار له گرنگترین ئەو چشتەیلەس ك ئى ئازو توانە ئەدادە ئنسان تا ئى تايبەتمه‌نديه داشتوود.
ئيمه جوور كورد هيمان نازانيمن ك وە راسى له چە ترسيمن! لە گوزەشتەی پڕ لە ژان خوەمان، لە ئایندەی ناديار خوەمان!! يا باس ئى دەورانە ك له کەس ناشنەفيمن باس ئمروومان بكا، چمان یە ترس گەورامانە . سەروەخوەیی و ئازادى خاك و ئنسان وەرجە هەر شوونێگ لە هەيرو نشان داين فكرەیلمان خوەى نيشان ئەدا، سەروەخوەیی ئەو چشتە نيه ك تەنیا لە ناو خوەمان باسى بكەيمن .
هیچ كورديگ نيه ئارەزوى وڵاتێگ سەروەخوەی نەیاشتوود ك ناسنامە و ئاڵاگەی هن خوەی بوود ، وەلی ئى خواست و ئاروزووە بى بەرنامه و و لە نەمەکڵان و لە شوون و وەخت نەگوجیاگ بەر یا سەمەر ناگرێ،!
وەختیگ سەروەخوەیی و سەروەری ئەخوازيمن بى ئەوە ك هويرەو بكەيمن ئايا نيشتمان هويرمان تاسووى ئەکا و وڵات رەنجەیلمان بياوانە یا ئاوەدان، یە پرسیار گەورا يا ترس گەورای ژیان هەر مللەتیگە!
تاوانبار مكيس ديوازماى ناهوميدى مللەتەیل ئەکا و وەل هەر کزە وایگ ديوار باوەڕەیل ئنسان ژار رمیەێد! ئمجا ئيمة فيشتر لە چە ترسيم؟ لە ئەوە ك هامسا جاڕ جياوە بوين فكرەيلمان وەرژە سەروەخوەیی خاكمانان بشنەفێ يا لە ئەوە ك بويشن هيمان وڵات باوەڕەیلمان ئازاد نەبیە؟!
بيلا وە دەنگ به‌رز فكرەيلمان بخوەنن وەلێ لە هويرەو نەوەیمن ك ئاسانەى هيچ هەقێگ چنە سەوك و ئاسان نیە ك لە خوەیەو بايدە ماڵمان و شەوگارمان روشنەو بكا!!
ترس راسكانى ئيمه ها ئەورە ك دڵ ئەوە نێريمن بويشيمن چەنێ ئاز ديريمن و ئمكانات خوەمان خەرج ئەکەیمن ئەرای ئى دروست كردن و بنيات نان نيشتمانێگ راسكانى نە وڵاتیگ ناديار و نارەسمی لە قسەیلمان!
دڵ گشتمان ها وەلای ئەوە ك تيەريكى بيليمنە جى وەلى ئى ترس نارەوا ك ناوى نايمنە (شەرم) و ئى فكر ماڵ رمنه ك نايلێ لەی هه‌مگە وڵات بى ناسنامە یەکیگیان ئەڵوژنيمن و بویمنه ماڵ خاوه‌ن، چوین هيلێ لە دنیایێگ ك ترس فەرمانرەواى راسكانيه ناو خوەمان لە بانى بنويسيمن؟.