وە وەردەوامی کەفتنە ورەر خەوەرەیل نەرێنی و کارەساتەیل بوودە هووکار زیایبوین هەس دڵتەنگی و دڵەڕاوکێ، توێژینەوەیل دەریخستنە وە دویاچگن کردن ئەرا خەوەرەیل پەیوەست وە وردەوردەیل سروشتی و مرۆیی توەنێد بوودە هووکار هەسکردن وە شەکەتی و فیشار دەروینی.
ئەوەگ فرە باوە، لە جەهان سۆشیال میدیای ئێ رووژگارە، وە گەورەکردن و رەنگینکردن و خاس نیشاندان کەسایەتیەیلیگ بی وەلیفەت و باوەتەیل پروپویچ و ئاست نزمە، کە وە شیوەی راستەوخوەی کاریگەری وەبان تەندروسی دەروینی فرە کەس دروس کەێد.
فرەیگ لە ناخاڵەیل لێوا هویرەو کەن ئەو کەسایەتیەیلە کە لە سۆشیال میدیا گەپەوکریانە خاوەن پێگەی کۆمەڵایەتی بەرزیگ و بار دارایی خاسیگن، نەڕەسیەس لەوەگ ئەوەی دوینرێد خوەدرخستنیگە و هویچیگتر، لەوەر ئیە کاریگەری بەدیگ لەبان دەروینی دروسکەێد جار بویە تا سنوور خوەکوشتن رەسیە چوینکە ئەزرەت زندگییگ جویر ئەوانەی ناو سوشیال میدیا کردیە.
هاتێ ئەگەر بچینە بندروس زندگی هەریەک لەو کەسایەتی ناودیارەیل ناو سۆشیال میدیا هەرە فرەیگیان خاوەن ئەو جویر روخسار رەنگین و سەرنج راکێشە نەون کە تو لە وەرانوەری خوەد وەکەم زانید خاوە ماڵ و ماشین مۆدیل بان نەون جویر ئەوەگ خوەیان دەرخەن، یە تەنیا نمایشگە هویچگ تر ، بەڵکم هەر یەک لەو کەسایەتیەلە خوەیان تویشبوی جویریگن وە بیماری دەروینی.
سۆشیال میدیا توەنێد سەرچەوەیگ گرنگ بوود ئەرا هووشیاری و زانیاری توەنرێد وەشیوەیگ تەندروس بارێدە وەکارهاوردن، گرنگیدان وە باوەت و خەوەرەیل ئەرێنی توەنێد ئیلهام بەخش بوود ئەوزەڵدان وە کارامەیی تاکەیل، تەنانەت توەنرێد لەریگەیان دەسکەفتیگ کاری بیاشتوید، ئەوەگ گرنگە ئەوەس تەنیا بزانرێد چوین وەکاری باریمن تا کاریگەری ئەرێنی وەبان تەندروسی دەروینمان دروس بکەێدو نەودە دویزمەیگ وەبان دڵ و دەروینمان.