حه‌سه‌ن شنگالی/ شار بەغداد وگشت شارەگان عراق، لەی رووژەیلە، چەو کردنەو لەوه‌راوه‌ر تاوانیگ نانەجیبانە و دڵتەزین ، ئه‌ویش کوشتن خیزانیگ کورد، لە شار مەنسور لە بەغداد، ک دکتۆر شیلان تەنیا دوێت خیزانەگە، دەسمیەت زەخمدارەیل خۆپیشاندەرەگان دیاد، تا ئه‌رك پیشەیی خوەی جوور پزشکیگ دەرمانساز وەجی بارێد، وخۆبەخشانە ئەرک نیشتمانی ورەوشتی خوەی ئەنجام بیەێد، چنه ك لە مەیدان تەحریر فریاگوزاری کردیاد لەمەوقەی خۆپیشاندانەیل تەشرین.
گونجیەێد ئەگەر جاروبار ناوگیر کوشتن بکەی لە چوارچیوی ئەدەبی ئەرا باس کردن لە رەوشیگ لە ستەم وخوسە، نەگ کوشتن راسی، جوور وەکارهاوردن وشەی کوشتن، کوشتن هویر یا کوشتن باوەتیگ یا کوشتن خاک یا کوشتن بیگوناهی، وئی تاوانەگ خەو لە چەو هاووڵاتیەیل بیگوناه پەڕان ک چەوەڕی نۆرەی خوەیان کەن نەگ لە هووکاریگ دیاری بیخودیگ بیلێد بکوشەگە تاوانەگەی جیوەجی بکەێد،
وکووشتن وشەیگە ئاشکرای کار گیان سەنین رکداریگە کەسایەتی گرنگیگ کەێدە ئامانج ک ئەو کەسە خاوەن کاریگەری هویرکردن یا سیاسی یا ئابووری بوود، یا کاریگ تووڵەکردن بوود کەسیگ کەێدە ئامانج ک لەلایەن بکوشەگەو جوور ریگریگە لەنوای بڵاوکرن هویرەگانی یا ئامانجە خراوەگانی ک کەنەی دەسپیچگ ئەرا کارە ناشرینەگانیان ک خوەی هیچ دەسپیچگیگ نەیرێد، مەگەر تەنیا لەلای دەروون خراوەگان یا هەستیگ وەکەمی لە سایکۆلۆژیی ک لەی بنەما دروس کریاگە، لە ئەنجام پەروەردەی لە ژینگەیگ ئیوەتکەر هویرە خراوەگان، هەرچەنی قوربانیەگانیان ورەفتارەیل وهووکارەیلیان جیواز بوون، کوشتنە سیاسیەگان زاقترین راسیەگانە لە مێژوو ،هەرچەنی کۆمەڵگاگان جیواز بوون ، ولەناو گشت رژیمیگ، چ دیکتاتۆر بوود یا دیموکرات.
رەوشە سیاسیە بەڕەڵاگە و نه چەسپانن ئاسایش هووکار سەرەکییگ بوی لە فراوانبوین سیمای کوشتن، ک هەرکەس لە سزا قورتاربوی هەڵبەت چەوی سەختەو بوود، ئەراوە چەویان سەختەو بوی و لەسزایش قوتار بوین، لە شکستهاوردن سیستمە ئەمنیەگە لە وەجیهاوردن ئەرکەیلیان لە ئەنجام بڵاوبوین رەشوەت لەناونی چینەیل دەزگا ئەمنیەگان وەتایبەت، و لەناونی دامەزراوەیل دەوڵەت عراق وەگشتی، و کامبردن لە جیوەجیکردن ئەرکە فەرمیەگە، بەڵکم واین لە وەرپرسایەتیەگەی گەردنیان و گومکردن ئەمانەت ئیدارەیی ک ئەرای ئه‌وه لە فەرمانگەیل دەوڵەتەگە كریانه‌سه فەرمانبەر. زنجیرەی کوشتنەگان رینمای پیلانداریگ دیرێد وەگورەی ستراتیژیگ لە ئەجیندا دەیشتیەگان ئەرا پەیاکردن رەوشیگ لە رخبردن لەناونی چینەیل کۆمەڵگاگە، ولەناوبردن تواناگان وەگشت پسپۆڕەگانیان ک هاندەێد ئەرا کۆچکردن مەغزە زانستیەگان وەرەو دەیشت وڵاتەگە تا عراق بوودە نێچیر ئاسانیگ و تیکەی تامداریگ ک بی هویرەگان وەبی ئاستیگ زانستی بڕاننەی و چەک بوودە تەنیا شیوەیگ ئەرا گفتوگۆ لەناوبەینیان لەوەر مەغزەیل پیسیان ک لەلایەنەیلیگ بیگانە وەڕیەوچن وەرانوەر مشتیگ لە دۆلار.