دوارەنویسی لە رودوس فەیلی "مستەفا بەیگی"
شەوێ بی، شەوگارێ بی
رووژێ بی، رووژگارێ بی
دە بان زەمین بزنێ بی گووشەێلێ قوت و کلیچکەێ‌قوت و خوەییش قێت و قووز، دە نام ئشکەفتێ داکاسیابی ئەڕا خوەێ تا زمسان تەمامەو ببێ.
ئی بزنە گووش‌بەلە، ئی بزنە دۆمچک‌بەلە، کێ نامێ بی؟
ئافەرم، بزن‌قوتەگە، نامێ بگی.
دە ئاسمان، دۆتەڵەیێگ بی، چەرمگ و نەرم و نووڵ جوور وەفر، نامێ کێ بی؟
:ئافەرم، زەمهەریر، نامێ بی.
بزنەگە ک دە بن ئشکەفتە سەرد و سڕەگە، مەندیر و چەمەڕێ هاتن "وهار کوردی" بی دە هەر کارێگ فرە هەڵەپەڵە دکرد و هەر چێ دوتن وەێ ک گڕێ دامەزرەو تا وەخت خوەێ بیاێ چمان کەڕ و کاس بی و هیچ چشتێ نەدژنەفت.
جگ‌جگ ک هەواگە جگێ تر شکیا و زار و زەمین پەسا هناس ئەڵدکیشا، بزن‌قوتەگە هنەو بی و سەرێ کیشا وە دەر و نووڕستە دەر و دەێشتێ ک دە ژێر پاێ، دە نام دەروەنەگە وڵاوە بی دڵەقرچی گرتەێ و زەقەێ کرد و باڵەباڵێ دە بانێ و گنجێ گرت و پڕستە دەر لە بن ئشکەفتەگە.
لەولاوە دە نام ئاسمان هەفتم "خاتوون زەمهەریر" ک هێمان ئازیەتبار براگەێلێ، دوفێشتر براڵە خاسەێ؛ "کوڕ سەیاێ" بی ک دە هەنسا نەچیرەوانی دە کێوەسان شوون‌گومەو بین.
هەر ساڵ چل شەو ماگه وە جەژن گەپ نەورووژ یانێ وەختێ ک ئەوان لە کەمرەو بین و لەش و تەرمێیان لە زقومی دە ژێر کوومەێ گەپێ لە وەفر رچکیابی دڵێ و خوڵکێ دگیریا و لە داخ یە ک براێلەێ ئەو ساڵەیش، هەمجا نیەسەیان ک وهارەگە ببینن، داخێ تازەوە دبی و لە قوڕن دڵەو دقیڕان و کوت‌کوت خوەێ کرد و ئەسر شەش‌پەلی لە چەمێ رێیا دگرت و دەسینگەێ دەسێ ک پڕ بی لە میەرگ و گژگ و رختە دبڕی و گلەگلە گژگەێلە وەرد تک‌تک ئەسرەێلەێ چەمێ، گشتێ لە ئاسمان دبینە گل و وڵات دگرتنە وەر.
ئمجا چوون هەواگە فرە سەردەو بی، دە دەم رێ گشتێیان رچکیان و دبین وە دانگەێل تەگر و رفت رفت دوارین وە مل دەر و دەروەن و کەش و کێوە و ماڵ و شار و ئاوایی.
ئەڵگەردیمنە بان زەمین.
بزن‌قوتەگە ک دەرهاتبیگە دەر لە ئشکەفتگە وە خوەشڵەخوەشییەو پەسا لە هەوەز هە واز دگرت لە بان ئی سان تا بان ئەو سان لە ناکام دانگەێ تەگر گەپ کوتریا وە دەرز تێوڵێ و قرق گیانێ دەرچگ.
لەو رووژەو وەرەو ئیلا گشت وڵاتوەندەێلە دە ئی رووژەێلە لە زەمهەریر و زق و دۆمازقوم ساڵ دترسن و ریەنەێلەیان ئەڕا لەوەڕ و زاڕووەێلەیان ئەڕا گڵ‌و‌گەێشت، نەدبنە دەر.