شەفەق نیوز/ لە وەردەوامی ئەو هەڵمەتە ک بڕیگ لە روشنهۊر و مامووستا و پسپۆڕ و دووسەیل زوان کوردی وەگشتی،  و شیوەزار کوردی خوارگ وەتایبەت، ک لەناو گرووپیگ لەبان (واتسئاپ) گردەو بۊنە، ئەرا ئی ماوەی دۊاییە، ک لە دانوسەنین و باسکردانیان لەو ووشەیلە خوازن دووراە وەکاریان بارن، و بخەنەی بان زوان ئی نەوەیل ئیسە، تا مقیەتییان لە فەوتیان بکەن، بەشیگ لەو ووشەیلە خریانە وه‌ر شیەوکردن ک به‌شێگیان وەوجۊرەگ باسیان کریاگە، نشانیان دەیمن:   

١/ چەڵەپەڕ .. دیارە ئی ووشە وەرانوەر لەناوچگن یا مردن تیەێد، ک بەشیگ وەگەرد ووشەی (چلەبڕ) شییەو کرد، و بەشیگیش باس ئی ووشە کرد ک ئەرا لەناوبردن کەسیگ یا چشتیگ هاتیە.     

٢/ ئەڵەک، ویژنگ ... ئەو چشتەسە ک کونای هۊرد دیرێد و چشتیگ وەناوی رەد بوود، تا هۊردەگە بچوود و هەراشەگەی بمینێد، و بەشیگ باس ئەوە کردن ک ئەڵەک لە ویژنگ هۊردەترە.     

٣/ کوتومت.. ئەرا دوو هاوشیوە تیەێد ک هەر چۊر یەک بوون، و بەشیگ ئاشکرا کردن ک خوەی (کوتمت)ە.

٤/ تۊک .. باس فرەیگ لەی ووشە کریا، ک فرەی شیوەکردنەگە وەگورەی ووشەی (مۊ) هاوردنەی، و بەشێگ جۊر تۊک لەش یا تۊک سەر، و بەشیگیش باس ئەوە کردن ک شایەت لەجیای ووشەی (فەروو) هاتیە جۊر تۊک خرس یا تۊک گورگ.     

٥/ سۊر .. ئاهەنگ سۊر، شایی، زەماوەند.   

٦/ ژەنین.. ئەرا چەن شیوەیگ لە کردەوە تیەێد جۊر: مۆسیقا ژەنین، یا چشتیگ بژەنێدە ئاو.     

٧/ گومەسار.. چشتیگ نفرەت لەلی بکەێ، یا بخوازێ دۊر بوود یا واز لەلی بارێ.     

٨/ ریخ برایی .. ئەو پەیمانەسە ک ناوبەین دوو کەس جیگر بوود،  ک هەردوگیان ریخ (سەنگ هۊرد) بنەنە چاڵیگ جۊر پەیمانیگ ئەرا برایی یا برادەری.   

 ٩/ کەوهەفی .. جۊریگە لە مار، وەلی لە شیەوکردنەگە شیوەی ئەو مارە وە ئاشکرایی نشان نەیریا.     

١٠/ شەوارە.. کەسیگ لە مەوقەی شەو لەڕیەگەی وڵ بوود، و بەشیگیش وتن مەرج نییە وە شەو بوود.    

١١/ شەوەزەنگ .. شەو تاریک، یا شەو رخبەر.    

١٢/ نقڵانە.. قسەیگە ک لە قسەیلی مەزەنەی کار بەدیگ کەێد، و بەشیگ باس ئەوە کردن ک لە نق قەڵا هاتیە.

ریپ .. ووشەیگە ئەرا داکاسیان و ئارامگردن هاتیە.   

١٤/ رچ .. هەنای چشتیگ تر وئیجا هشکەو بوود، جۊر (پەنیر، کاستەر).

١٥/ زرکە .. بریقەی چەو کەسیگ ک نەخەفتیە و نووڕێد.