کەنعان حاتەم / ئووشن؛ مەگەزیگ لەبان شاخ کەڵگایگ نیشتەو، کەڵگاگە تەکان دیادە گاوەسن، و جفت زەویەگە کردیاد.

هەنای مەگەزەگە چیەو، هووز مەگەزەیل لەلی پرسین، ئایا ئەراچە شەکەتی؟

وت: خەریگ چفتیاری بویمن.

مەگەزیگ تر لەولاو وت: منیش ئەگەر گووش ئەسپەگە فرە نەلەرزیاد، وەنە چەن سواریگ تر لە جەنەگە کوشتیام.

لەی چینەیلە هەمیش لەناو ئایمەیل هەس، ک هەمیشە خوازن رەنج یەکیگ تر وەناو خوەیان تۆمار بکەن.

لە گشت کاریگ و گشت پیشەیگ دوینیمن کەسەیلیگ وەبی هیچ رەنجیگ هاوماڵی کەن وەگەرد عەرەق و خوین رشنەیل ئەرا خزمەت گشتی، و تەقەلادەن ئەو عەرق و خوینە بکەنە خزمەت بەرژەوەنی خوەیان.

یەکەمین چین لەناو کۆمەڵگای عراق رەنج وعەرەق وخوین رشان لە سەرایسەر ئی وڵاتە، و لە وڵاتەیل هاوساییش جوور ئیران، خوەی کورد فەیلی بوی، و هیمان وەردەوامە، و هیچ وەختیگ لە ئایندەیش لە رەنج و تەقەلا خاسەگانی نێەوسیەێدەو، هەڵبەت مەگەزەیل بان سەروشان کورد فەیلی ئەوانیش لە تەقەلایل تۆمارکردن ئی رەنجەیلە وەناو خوەیان واز نێەتێرن، چوونکە کردەوەی کورد فەیلی لە چینە نەختەگانە، جوور مروارییگ تا رەنج  خوەی لە بن دەریاگان نەیەێد، نیەوودە مرواری، و هەرچەنی یابان مرواری دەسکرت دروس بکەێد، نێەڕەسیدە ئەرزش مرواریە راستەقینەو سروشتیەگان، لە عراق کوردەیل فەیلی چ دەوڵەمن بوود هەکاتی جاران وەختا قەرز دیادە حکومەتەگان، چ نەدار بوود هەکاتی ئیسە ک حکومەتەگان دەسنانە بان دارایی باوگ وباپیریان، هەمیشە ئەرزش خوەی دیرێد، ئەراوە هیچ وەختیگ لەناخ خوەی نیەڕمێد، ئەگەر ماڵیشی رمانن، و قەت لە دەوڵەمەنیەگەی کەمەو نێەوود، چوونکە خاوەن سامانیگە دەروینی، و سامان دەروینی کۆتایی نەیرێد جوور ئەو سامانەگان تر، تەنانەت نەفتیش چەن ساڵیگ تر کۆتایی وەپی تیەێد.

بڕیگ هەس، ماڵ گەورایگ دروس کەن، تا ئایەمەگە لەناوی نیشتەجی بوود، وەلی کورد فەیلی، مرۆیی گەواریگ ئەرا خوەی دروس کردگە، ئەگەر لەناو بیاوانیگیش بوود ئاوەدانی کەێد.

لە نموونەیل رفانن کردەوە توکمەگان کورد فەیلی ئەوەسە ک گشت لایەنەگان وەناو کورد فەیلی ئەرا خوەیان پڕۆپاگندە کردیان، تا ئەوەنە هەرچی ماڵ ودارایی و  قوربانی و خەبات و ستەمدیدەی کورد فەیلی وەناو خوەیان تۆمار کردن، و رەسینە بەرزترین ئاستەیل ماڵداری و ناوداری، وەلی تا کەی؟.