شەفەق نیوز/ سامی فەیلی سەرۆک كۆمه‌ڵه‌ی کورد فەیلی، هویردەکاریەیل دامەزرانن کۆمەڵەگە ئاشکرا کرد، و ئەو قوناغه‌یله ک وەپیان رەد بوی و ئەو سەختیەیلە ک کەفتنە نوای، تا وسیانی لەوەر هووکارەیل دارایی.
کۆمەڵەی کورد فەیلی، یەکەمین کۆمەڵەس ئەرا ئی چینە، و هاوکاری ئەرا بزووتنەوەی ئازادیخواز کورد داشتیە، ک لەناو هەرێم کوردستان گورج بویە، تەنانەت هەنای فرە لە هاووڵاتیەیل کوردستان ئەرا ئیران دویرەو خریان، ئی چالاکیەیلە وەردەوام بوی، باوجی وەرجە ماوەیگ ئی کۆمەڵە لەکار وسیا.
ئاژانس شەفەق نیوز، لە هەولێر، چەوی کەفتە سامی فەیلی سەرۆک کۆمەڵەگە، و باس هووکارەیل بەسیان کۆمەڵگە کرد ک وت: کۆمەڵەی کورد فەیلی لە سەرەتای دامەزرانی لە ١٩٩٧ ناوەندیگ روشنهویری بوی، و هووکار وسیانەگەی خوەی وسیان پاڵپشتیکردن دارایی لەلایەن حکومەت هەرێم کوردستان بوی، ک مانگانە چوار مەلیۆن دینار ئەرامان تەرخان کرد، و توەنستیایمن وەی پویلە کاروبار کۆمەڵەگە بوەیمنە ریەو، هەرلە کرای شوینەگە و مووچەی فەرمانبەرەیل و خوازینەیل کۆمەڵەگە، وەگەرد دەسمیەتیدان فه‌قیرو ژارەیل، ک لەناو کارەیل کۆمەڵەگە بوین، باوجی لەوەر وسان هاوكاریه‌یل حکومەت هەرێم کوردستان ناوەند و کۆمەڵەیل فرەیگ بەسیا، و کۆمەڵەی کورد فەیلییش لەناویان بوی، ک ئەو مەوقە ناچار بویم کرای شوینەگە و مووچەی فەرمانبەرەیل لە گیرفان خوەم بیەم، تا دی توانامان نەما، و ناچار بویمن کۆمەڵەگە بوەسیمن.
لەباوەت توانای دووارە وازکردن کۆمەڵەگە ئەگەر زەمینەی گونجیایگ پەیا بوی، فەیلی وت: ئەگەر پاڵپشتیکردن دارایی وەلایەن حکومەت هەرێم کوردستان گلەو دریا، خو بیگومان ئیمەیش ئامادەیمن جاریگتر کۆمەڵەگە واز بکەیمن.
فەیلی باس چەن ویستگەیلیگ میژووی کرد، هەرلە راگەیانن به‌یاننامه‌ێ ١١ی ئادار هەنای گەنجەیل فەیلی گردەو کردیمن، و روی کردنە مەیدان تەحریر لەناوڕاس بەغداد پایتەخت، ک فەیلی باس هویردەکاریەیل ئی رویداوە کەێد و ئویشێد: مەوقەی راگەیانن رێککەفتنەگە، سەرۆک عراقی وەرین ئەحمەد حەسەن بەکر، و سەدام حسێن جیگری لەو مەوقە، و ڕەحمەتی ئیدریس بارزانی لەناو مەیدان تەحریر بوین، و نزیکەی ٩٠ لەسەد ئەو جەماوەرە کورد فەیلی بوی.
لەباوەت بەشداریکردنی لە کۆنگرەیل پارت دیموکرات کوردستان، فەیلی وت: بەشداری لە یانزەهەم و دوانزەهەم و سێەنزەهەم کۆنگرە کردمە، و لە کۆنگرەی چواردەهەمیش ک لەی مانگە ئەنجام دریا.
سامی فەیلی تەقەلا دا مەڵا بەختیار لە دەسگیرکردن ئەو حزبە رزگار بکەێد ک لەو سەردەمە ڕەحمەتی جەلال تاڵەبانی سەرۆکی بوی، ک سامی فەیلی لەی باوەتە وت: من لە تەهران بویم و ژنەفتم ک مەلا بەختیار لەلای یەکێتی زیندانی کریاگە، و ئەویش لە لاوان وەردمان بوی و ناوە راسیەگەی حکمەت مامە کەریمە، و گشتمان تەقەلا دایمن مەرقەزی بکەیمن، و من وەرپرس رێکخستن پارتی بویم لە تەهران، و توەنستیمن بڕیگ واژوو ئەرا مەرەقەزکردن مەڵا بەختیار گردەو بکەیمن، و پارێزەر جرجيس فەتحوڵڵا هەمیش واژوو کرد، و من و جرجیس چیمنە لای فوئاد حسێن هانای هاتە تەهران، و یاداشتەکە دایمنە دەسی، و ئەرام وت: مەرقەزکردن مەڵا بەختیار هادەس مام جەلال، و لە سوریا چەوەڕییم کەێد، و ئەوەسا ئی پەیامە دەمە دەسی، و دویای ئەوە دی جاریگتر نەیمەی، و نیەزانم ئایا مەڵا بەختیار وەو یاداشتە لە زیندان دەرچگ یا نە.
سامی فەیلی لە باوەت رویداوەیل ڕاپەڕین ١٩٩١ قسە کەێد، ک ئویشێد: هەنای ڕاپەڕین دەسوەپی کرد من لە تەهران بویم، و بەشداری وە پیشکەشکردن فرەیگ لە هاوکاری مرۆیی کردم و رەسانمەی کوردستان، و هەمیشە پشتگیری بزووتنەوەی ئازادیخواز کورد کردمە.
وتیش: ئەو هاوکارییە تەنیا لە ماوەی ڕاپەڕین نەویە، باوجی دەسمیەتی فرەیگ وەو خانەوادەیلە کردمە ک لە هەرێم کوردستان ئەرا ئیران دویرەو خریان، جویر زەخمدارەیل په‌لاماره‌یل کیمیایی، و ئەوەکانتر وە هاوکاری خوەراک و دەرمان و ئەو خوازینەیل.
سامی فەیلی، لە تەهران ساڵیادەیل کووچکردن ریبەر کورد مەڵا موستەفا بارزانی و ئیدریس بارزانی کوڕی کردیاد، و لەی باوەتە ئویشێد: گشت ساڵیگ پرسەی ساڵیاد کووچکردن ریبەر کورد مەڵا موستەفا بارزانی و ئیدریس بارزانی کوڕی لە مزگەفتەیل تەهران نیام، و وەرپرسەیلیگ ئیرانی و جه‌ماوەر فرەیگ هاتیانە پرسەگە.
دەربارەی پەیوەندی وەرد حزبەیل عراقی و کوردستانی لەو ماوە ک لە تەهران بوی، فەیلی وت: لە سەردەم ڕژیم وەرین، گشت حزبەیل ئۆپۆزسیۆن لە ژیر پەرچەم پارت دیموکرات کوردستان بوین، و فرەیان لەناو هەرێم کوردستان بوین، و من ناونی خاس و گەورەیگ وەگەرد گشت حزبەیل عراقی و کوردستانی داشتمە، و هەمیش وەرد باڵیۆزەیل ئەو دەوڵەتەیل، باوجی هەر حزبیگ وە کار و چالاکی خوەی سەرقاڵ بوی.
سامی فەیلی دەسیگ لە پشتگیریکردن یانەیل وەرزشی فەیلی داشتیە.
فەیلی هەمیش ئویشێد: دویای دامەزرانن یانەی وەرزشی فەیلیەیل لە بەغداد وەلایەن یەکێتی نیشتمان کوردستان، شاندیگ لە یانەگە ئەرا لام هات، و داوای دەسمیەتی کردن و منیش سەرپەرشتی گردەوکردن دەسمیەتی ئەرایان وەلایەن حکومەت هەرێم کوردستان کردیام، و ئەرایان کلی کردیام، چوینکە دووچەوەکی لەناو حزبەیل نەزانستیمن، ک پارتی وەو جویرە هوکارەمان کردیە.