شەفەق نیوز- خوداداد ئبراهیمی، بەرپرس رووژنامەێ سەرانسەری و نامدار (مێهران) و لە چالاکەێل سیاسی و فەرهەنگی ئیلام، دە وتارێ وەێ چەواشە ک جووور کەلەمەێ دیاریێگ نواێ تەوسعە و گەشەوەری ئوستان ئیلام گرتگە هشارەیێگ کردگە و وتگە ئی دۆمادۆما، بەستامی نمایەندەێ ئیلام دە پارڵمان قسەێ کردگە ک وڕینە خستگەسە دڵ وڵات و خەوەر داگە ک بان 53% وڵاتوەندەێل ئیلامی، پەسا دە ژێر هێڵ هەژاری و چارەڕەشی و دە فڵاکەت دژیین ک چەن جار ها ئەو بان‌تر ژاری و کەمدەسی.
ئەوی نووسانگە: یە خوەێ تراژدی سەختێگە ک 95% نەفت و گاز لا روژئاواێ ئێران ها دە ئیلام و نمام و نوونمامەێلەێ ئیمە وەێ‌جوورە رێچاو و ئەزرەتمەنی وە گشت چشتێ دیرن و هانە وەر لەفەێ تڵاق و شێویان بنەماڵەێلەیان، ناکامی، ئێعتیاد و ... ک جوور شەوە چنگ ناگەسە قوڕگ وڵات و رەوان ئیلامییەێلە ئەوشێوانگە.
ئی رووژنامەوانە وە جواو نەداین وەزیر نەفت ک خوەێ کرماشانیێگە وە داخوازیاری ئیلامییەێلە ئەڕا هاوردن شرکەت نەفت و گاز وە ئیلام و سەر وە خوەێ کردنێ دە ئیلام، ئەڵتەژیاگە و وتگە: ئیلام دە نام ئاخڵەێ بەرنامەڕێژی وزارەت نەفت وە دیل گیریاگە و بڕێ جوور گوردە دنووڕن و ئیلام و ئی باپیڕەێلە ک ساڵیان ساڵە بەش ئیلام خواردنە و چاڵە نەفت و گازەێلەێ داگیر کردنە یەیش وە هەق خوەیان دزانن ک ئێسە دەس بننە مل چالەێل نەفت باباگیر ک هن ئیلامن و زەنگنە، وەزیر نەفت ک خوەێ کرماشانیێگە دیرێ وە زوور خوەێ دکەێگەیان وە بەش کرماشان.
نادر شووهانی، لە کارناسەێل بەرنامەڕێژی دە ئیلامیش ئی کارە نەوەکارناسی زانستگە و دە وتارێ تر هەدەو رووژنامە وتگە: مەخزەنەێل نەفت، هن ئوستان خاون زەمینەگەین و ئی کارە ک زەنگنە، جوور وەزیر نەفت کردگە یە دەێنگەڕیێگە دیاری ئەڕا زێد و ماواگەێ خوەێ و داگیر کردنێگە ک ریشگ دە دوچاوەکی کردن دیرێ نە پایەێ زانستی و حوقووقی و بەرنامە‌ئی، ئوو هەم وە قاعدەێ حیازەت و هەمیش وە قاعدەێ بێ‌خاونی مەخزەنەێل نەفت، وە بان هەردوگێیان، خاونی مەخزەنەێلە باباگیر ئەیوان ئەڵگەردێ وە خاون‌زەمینەگەێ، ئوو وەوجوورە ک ئێران هەبەشە کریاگە دە نامبەین ئوستانەێلە، لە سەرا باباگیر هە دریاگە وە ئیلام و چوون چاڵەێلە هانە سنوور ئوستان ئیلام، گشتێ هە هن ئیلامە نە هن کرماشان.
خووە بزانن ک ئی کار وزارەت نەفتە، بڵخەێ گەنێ خستگە دە ئیلام و روووژنامەێل و سایتەێل و شەواچەێل مەجازی، ئوو حەتتا کاناڵێ دە تلگرام نریاگە وە نام (تورموز زەنگنە بکیشن) ک تا ئێسە 28902 ئیلامی بینه‌سە ئەندامێ و هە رخنە و هەڕەشە لە زەنگنە دکەن.