شەفەق نیوز/ وەرجە ساڵیگ لە مردن "کافکا" (نۊسەر ئەڵمانی)  ئەزموون فرە مەزنیگ وەخوەی دێ، و لەبانی نۊسان.   لەناو باخچەیگ لە پەرلین، کافکا نووڕیە مناڵیگ وەرەنسک گیرستن دەێد، چۊنکە وەیلکانەگەی گوما بۊە، کافکا کەفتە مینەی ئەو وەیلکانە، باوجی پەیای نەکرد. 

کافکا وەو مناڵە وت: بچوو ئەرا ماڵ خوەدان، ئمشەو بخەف، و سوو وەیەکەو دووارە کەفیمنە مینەی وەیلکان.  

هەنای رەسیە ماڵ، کافکا بڕیار دا لە پەیامیگ وەزوان ئەو وەیلکانە ئەرا مناڵەگە بنۊسێد، و سوو بەێدەی دەس مناڵەگە، چۊنکە دەس لە پەیاکردن ئەو وەیلکانە شووردیە. 

پەیام وەیلکانەگە ئەرا دۊتەگە:   

دووسە گرانەگەم، داوا لەلید کەم واز لە گیرستن بارێ، چۊنکە من بڕیار دام بان بگرمە وەر تا ئی جەهانە بۊنم و چشتەیل نوویگ بچاشیەم، ئەوەسا هەر رووژیگ باس ئەراد کەم چە بوود و چە دۊنم. 

ئەرا ئی رووژەگە، هەنای کافکا ئەو دۊت مناڵە دی، کافکا پەیام وەیلکانەگە ئەرا مناڵەگە خوەنێەو، و مناڵەگە دڵی خوەشەو بۊ، و وەگەرد بریقەی ئەسر چەوەیلی، زەردە خەنەیگ لەبان لیوی پەیا بۊ.

باوجی یە تەنیا پەیامیگ نەۊی، باوجی یەکەم هەڵقەی زنجیرە پەیامەیلیگ بۊ لە زوان ئەو وەیلکانە ک باس ئەرا ئەو دۊتە کەێد، وە شیوەی رەنگینیگ، و وەزوان شیرینیگ. 

دۊای تەوابۊن ئەو پەیامەیلە، و باس کارەیل رووژانەی ئەو وەیلکانە، کافکا وەیلکان نوویگ و جیاوازیگ ئەرا ئەو دۊتە دیاری کرد، و پەیامیگ نوو وەگەردی نۊسان ک ئۊشێد:  (گەردین جەهان شیوەم ئاڵشت کرد، وەلی یە هەر خوەمم).  

ئەو دۊتە گەورە بۊ، و وەیلکانەگەی کافکا وەگەردی بۊ، تا رووژیگ لە رووژان، پەیامیگ لەبن باڵ وەیلکانەگە پەیا کرد، ک لەناوی نۊسیاگە:   

ئەو چشتەیلە ک دووسیان دیریمن، هەمیشە کەفنە وەر گومابۊن، باوجی دووسی وە شیوەیگ جیاواز گلەو خوەێد، من باوەڕ دیرم ک ئەو دووسیەگ وەدڵسوزی دایمنەسەی، قەت گوما نیەوود، وبیگومان ئەرامان گلەو خوەێد، باوجی گرنگ نیە ک لەخود شۊن گومابۊنی چەوڕییان بکەیمن.

بایەتە خەریک گیرستن نەۊمن، ک خوەی لە پەنجەرەیگ رەنگینتر لەناو دڵمان پەیا بوود.