شەفەق نیوز- دو برای لفانەی ئیلامی لەوح زێڕین و ملوەن بلوورین و تەندیس تایبەتی وەرگرتن.

ئی دو هونەرمەند ئیلامییە ک وەیەکا دەرهێنەری فیلم (چوارقوڕنەێ سۆر/ مستطیل قرمز) ده ملێیان بی، دە دومابەش دوانزەهمین جەژنوارەێ فیلمەێل وەرزشی خەڵاتی کریان.

دە ئی مەراسمە ک دە تێهران ئەونریا، وەزیر وەرزێشت ئێران ئوو بڕێ لە بەرپرسەێل و دەس‌دەناوەێل وەرزێشتی و هونەری لە بیس وڵات دنیا بەشداری کردن.

 ئی فیلمه وەر ژە یەیش دە جەژنوارەێ فیلم وەرزشی میلان خەڵاتی کریاگە.

سازەندە‌ێ ئی فیلمە سەیدعەلی‌ڕزا سەجادپوور بییە.

ئی فیلمە دەبارەێ شەل و کوت کردن و کوشت و بڕ کریان بڕێ ژن و زاڕوو و تووپانکار ئیلامی وە  بومباران هەواپەیما عراقییەێلە سازریاگە ک سی و چوار ساڵ پێش دە شار چەوار ئەرکوازی دە ئوستان ئیلام کەفت.

خاسە بزانن ک ئی بار و دەوخە، دە ناوبەێن ناوەێ هەفت مانگانێ ک هەر ساڵ و دە دریژاێ هەشت ساڵ جەنگ ئێران و عراق دکەفت ئوو وە نام (شەڕ شاران) نامگیرەو بی، ئوو فێشتر عراق و کەم‌تاکوتێ ئێرانیش وە مووشەک و بومباران شارەێلەێ یەکترەکی دکوتان، کەفت.