کەیوومەرس بەلەدە
سه‌خته سه‌خت، نووڕسن وه ئایه‌مێگ ها له حاڵ گیان که‌نین.
وه یەی هناس هه‌ردو پای سڕ بوود و هناس تر تا ناوشان، هناس گه‌ورایگ له قوڕن دڵا بکیشێد و من و ئایه‌مه‌گان وه ده‌ورێیه‌و وشکمان بوەیده‌و!
هه بیلا له ئه‌وه‌ڵا بۊشم سێ نه‌فه‌ر هانه ناو ئێ ره‌وایه‌ته داڵگ و باوگ و کوڕ، یه‌یشه بزانن ئێ داڵگ و باوگه هه یەی کوڕ نەیرن دا دوانزه دۊه‌ت و کوڕ دێرن، ئمجا یه کوڕ بۊچگه و ئەویشەم کوڕ بۊچگه له یه‌ۊ بۊچگتریش دوو سێ دۊه‌ت هه‌س و گشتێیان هانه سه‌ر زنه‌ی خوه‌یان، ئێ کوڕیشه ژن دێرێد و داڵگ و باوگێ هانه‌و سه‌رەی یه‌ۊ.
باسمان له ئاوایێگا ده‌س وه پێ کەێد،
ئاوایێگ چه‌مێگ وه ده‌ورێیا خڵیف خواردێیه له شه‌وه‌کیان وه‌هار هه‌ڵپه‌ڕین ماسی وه سه‌رێیه‌و و جلیق فلیق دان خوه‌یان هه‌نای سفیدی ژێر زگێیان که‌فێد له خوه‌ره‌گه و بریجق باق کەێد شێت ئایه‌م کەێد.
ئۊشن هه‌ر ماسیێ له‌و پاپه‌ڕنگه بپه‌ڕێده‌و، تیەیده زیق وڵنگ، چه‌مه‌گه نیمه‌ڕووان تاوسان بووده گوڵه‌م مه‌لیەی مناڵه‌یل و وه‌رجێ له یه گ که‌سێ بپه‌ڕێده‌و ناوێ یه‌کێ مشتێ خه‌ڕێ برنگ دەیده ناو چه‌مه‌گه و وه‌هار ئۊشێ (مه‌ڵ موورت وه شه‌و م وه رووژ)
ئێ ئاوایه مردێیه‌یلێیانیش هه لەی چه‌مه له بان چێته کوڵی قوسڵ ده‌ن و ئاوه‌گەی ئڕایان ته‌وه‌ڕکه.
چەمەگە ناوێ ڕاوەنە، شوون پای له ناو کولی مه‌ته‌ڵه‌یل نه‌نگم هه‌س خوەی ئۊشێ ئاو چه‌مه‌گه چۊ گیان له ناو له‌ش مه‌ردم ئاوایا په‌خشه‌و بۊه، هویچ کاممان تاوشت دۊریێ لەی چه‌مه نه‌یریم.
م لەی گه‌په خاس نه‌ره‌سیمه‌سه‌و بڕێ له مه‌ردم وه‌تن راوه‌ن یەیراس رشێده به‌هه‌یشت. چه‌ن نه‌فه‌رێگ له ناوێ مڕداره‌و بۊن و وه‌تن راوه‌ن ئایه‌مه‌گان پاڵۊد و ئاوای له پیسی رزگاڕ کەی، نیه‌زانم ئمجا ئێ گه‌په که‌مێ زۊنه‌س.
م لەیره که‌فتمه‌و هۊرم له‌پسا دۊره‌و بووم چه‌م ها له تاف خوەی بیلا له ئه‌ولا بۊشم لەی ره‌وایه‌ته که‌سایه‌تی داڵگ و باوگ پیر بۊنه و کوڕه ها له جووش جوانی، ئه‌وان خوه‌شێیان تیەید له ناو ئێ ره‌وایه‌ته گه‌په لێیان بێریەێد.
زانی ئه‌وان فکر که‌ن ئارده‌یل خوه‌یان هه‌ڕینه، کوڕه جاڕێ ها له جووش جوانی، هه‌ڵا هه‌ڵا و هاوماڵی کردن وه‌ل هه‌ر گیانه‌وه‌ر دوپایگا، ته‌نیاس و ئرس میرات فرەیگ ها ژێر ده‌سێ؛ له هۊچ جایگ ماوای نیه‌گرێد. هه‌ر وه ساتێ فڵنگه کەید و لەی ره‌وایه‌تیشه دەیده‌و ده‌یشت.
م وه زوور به‌جه‌رێ که‌م یه‌یشه بزان له هرس دان، ئێ وڵاته وه کولی تێرێ نیه‌کەی.
جن و مڵایکەت لە پاپەڕنگ ئاوایی جی گردۊن و ئڕای خوەیان هسار و ماوای داشتن.
له سالیار دۊر وه‌تن کلای مامه ناوێگ، یەی شه‌و له ناو سۊرێیان بۊه و که‌سێگی ده‌سێگه لێ نه‌وه‌شانیه و جه‌ماعت کاره‌و پێ نه‌یاشتنه، ئڕای بان سه‌ر عرووسه‌گه هاتنه سه‌روه‌ن له ماڵ خان بردنه.
ئه‌وسا هه‌نای کلای گه‌په لێ داس که‌سه پێ باوه‌ر نه‌کردێیه ئه‌ۊش وه‌تێیه هه له‌و سۊره چه‌قەی مۊشکه که‌فته‌سه په‌ڕ سه‌روه‌نه‌گەیا بچن بارنەی، مه‌ردم جه‌م به‌ساۊن و وه چه‌و خوەیان کونای دوقورووشی له جز سه‌روه‌نه‌گه دۊن. له‌وساوه که‌سێ وه گووش خوه‌رئاوا لەی پاپه‌ڕنگه نه‌په‌ڕیه‌سەو، نه ک باڵ په‌ریێگ بتلنێد.!
گه‌پم له سه‌ر کوڕه بۊ له هرس دان ئێ شاره وه کولی تێرێ نیه‌کەی، شار ئۊشم ئێرنگه هانه شار ئاشنای من وه‌ل یانەیا ره‌سێده سه‌رده‌مێگ قڕدێگ مناڵ بۊم و وه ماڵ یانه هامشوو کردم. ئۊشن هۊر مناڵی تێژه زانین وه زوور وه هۊرم تێد هه ئێ ئایه‌مه ک له ئه‌وه‌ڵ وه‌تم ها حاڵ گیان که‌نین وه جوانی، جوانی ئۊشم گه‌ها چل په‌نجیا ساڵان دیمەی، ئاگرێگ بۊ له ئاسمان که‌فتۊده‌و خوار بووره‌و بۊن چه‌وه‌یلێ زیه‌ڵێ زیه‌ڵێ دار دێڕێ، له مه‌ردم شنه‌فتم سه‌رته‌ریه بۊه کوڕ وه دڵاوه‌ری یه‌ۊ لەی وڵاته له داڵگ پێیا نه‌ۊه و نیه‌ود، وه‌تن له کونای کەیانا گوور داسه‌و بان وچه‌ن جار خاوه‌ن ماڵ له ناو ته‌ۊله و کەیان به‌ساسه‌و، کڵاو دەسماڵەگەی وە سەرێیەو بۊ و دایم سه‌ره‌خڕی کرد.
رێ کردنێ له‌وای ده‌و مێنس، م ئێ باسه کردم ئه‌ر که‌سێ له‌و سه‌رده‌مه ره‌وایه‌تێ بنۊسیاد حه‌تمه‌نای حه‌تمه‌ن یه‌ۊ له ناو ئه‌و ره‌وایه‌ته جیه‌و نه‌کرد و که‌سێ نه‌وێرس ناوێ بوەێد.
لەی ڕه‌وایه‌ته ژنیش بۊ، ژنێگ، ئه‌ر بچیمه‌و سه‌ر هۊرمان ئه‌و سه‌رده‌مه یه‌ۊ وه ته‌نیا دوای تیمارکه‌ر ئاوای بۊه، هه‌میشە عرووسه‌یل ئاوای یه‌ۊ ڕە‌ژیه‌سان و فه‌ره کاره‌یل تر…
توام یه بۊشم ئێ پیا و ژنه له سه‌رده‌م خوەیان ناودار و کارا بۊنە، یه نه‌وه‌تم پیا به‌نایش بۊ له ڕووژێگ هه‌وسڵه بێاشتاد و وه‌رده‌سەی فرەیگ، ژێرخان و باڵاخانێ درس کرد.
شه‌وانه هه‌نای چراخ تووری له ناو وه‌رەیوان ڕووشن کردن، باوه‌ڕ که‌ن ئاوایه‌گه وه کولی کرده ڕووژ ڕووشن، تازه ئه‌وه‌ڵ ڕادۊنیش یه‌ۊ هاوردۊده ئاوای.
له یه‌کێ شنه‌فتم وه‌ت: ئیمه ئێواران له وه‌رەیوان جه‌مه‌و بۊمن، ڕادۊنه‌گه چه‌کانیم تا عه‌لی نه‌زه‌ر خودا بیامرز ئڕامان دپڕووقەی بچڕیا،
رووڵه زانی ئێ هووره چڕیشه له جوانی مرد و بۊه خه‌وێگ ئه‌و سوو ناێد.
بوه‌خشین جارمه‌وق خوه‌میش له ره‌وایه‌ت ئه‌سڵی دۊره‌و که‌فم،
زانین هه ئێ هۊرمانه له هۊرمه‌و نیه‌چوود و گه‌ها خوه‌میش به‌شێ لەی ره‌وایه‌ته بووم
و پیا و ژنه -هه پیاگه ک ئێرنگه گیان که‌نێد-باپیرم و نه‌نگم بوون و یاروو گ هە لەی ڕەوایەتە دەرچوود و چوودە هەڵا هەڵای خوەی، خاڵووم!
باس سه‌ره‌کی زانین له کووه‌و ده‌س وه پێ کرد، له‌و ساته ک کوڕ فراری و ژنەی سه‌نگ یه‌زیدی دان له قه‌و، هاوردنەیانه شار.
فه‌ره شیه‌و نیه‌که‌م و ته‌نیا یه‌یشه ئۊشم ساڵێگ مه‌لۊه وارۊد ها هۊرێیان و ئۊشن هه چمای دۊه‌که بۊ و ئۊشن فه‌ره ساڵه‌یل تریش کیسه‌ڵ ئاوایمان نا خه‌ڕێ و چه‌ن جار قتی رۊ نا لیمان و هه‌میش له تێوڵ راوه‌ن گیان ده‌ر کردیم، هێمای هه‌سه‌مان تا دوا وه حاڵێ بکه‌یم و چه‌میش ها له تاف ده‌و.
م خوه‌میش له کفته وارین مه‌ته‌ڵه‌یلێگ شنه‌فتم و یان گه‌پێگ له سه‌رێ نێیان فه‌ره شیه‌و نیه‌که‌م و که‌سایه‌تیه‌گانم شه‌که‌ت نیه‌که‌م.
توام باس ئمڕوو بکه‌م ئه‌و گه‌وراماڵه هاتنه‌سه شار له ناو ماڵ بۊچگێ، ئه‌وه‌یش له په‌ڕ شار و له ناو ڕێ قه‌ورسان.
نه‌نگم-ئێرنگه دی ئێ خودا ڕامه‌تێ بکەێد- وه‌ت: رووڵه ئێ قه‌ورسانه خه‌وفنه‌کداره، فه‌ره شلخ پلخه، هه داره‌گانیش چۊ دار نین و له جی وه‌ڵنگ دڕگ و ده‌رزی گردنه، رووڵه لەی شاره هناسم قت بوود و ئێ خێاوانه‌یل قیلینه قورووژێده‌م، ماڵه‌گه زندانێگه، م کەی ئاده‌ت وەی کوڵانه دێرم.
وه هه‌رکەیا ره‌سی یه‌قەی گردیا و لاڵکیا: ڕووژێگ مردم له قه‌ورسان ئاوای چاڵم بکه‌ن، یه ته‌نیا وه‌سیه‌ت منه.
باپیرم، دایم دیم له بان پلەی ده‌ر هساره‌گه ده‌سه‌ونجێ نیشتۊد و قووخ داۊده مل قه‌م گوچانه‌گەیا و چه‌و بڕۊده داره‌یل ناو قورسانه‌گه‌یا.
زانین.. وه خودا قه‌سه‌م نه ته‌نیا م، هیچ که‌س تریش له ده‌مێ گه‌پێ له بارەی خوەی نه‌شنه‌فت و هێمای که‌سیش نیه‌زانێ چوه ها ناو دڵێ.
ئێ یارووە خوەی ئەو دەس نیەێد و لەی ڕه‌وایه‌ته هۊچ نیه‌ۊشێد، ها له چرپ چاپ خوەی و منەی ڕێ فەرار کەێد!
یه بۊ دکتره‌یل فرەیگ له ده‌رمانێیان ئاجز مه‌نن و سه‌رێیان سڕ مه‌ن.
لەیره ئێ که‌سایه‌تیه ک له ده‌سم فرار کرد و منی گومێ کردم، یەی ئێواران گشتێمان له ماڵێیان کوو بۊمن و نه‌نگم ده‌مه‌و بان ئڵاژیاۊد و ته‌نیا م زانسم وه وه‌هار ئاوای فکر کرد و له‌پسای له دڵه‌و عه‌رووسێگ له ناو وێیار‌گه ڕه‌ژی و مه‌ردم فرەیگ له ده‌ورێ خوه‌شی که‌ن و چه‌پ کوتن.
یه باس دو سێ رووژ له‌یه‌وه‌ره و ئمڕوو ئێواره‌س، باپیرم ده‌مه‌و بان خه‌فتێیه و چه‌وه‌یلێ زڕناقه دانه‌سه قەی سه‌قف وتاقه‌گەیا، چراخ تووری شه‌وق دارێگ له خێاڵێ له ئاوای ڕووشنه و له‌پسای ژێرخان باڵاخان نه‌نوومه‌تێگ دروس کەێد تا خوەی و ژنەی له ناوێ جیه‌و بگرن و بچنه ئه‌و ڕووژه‌یله و که‌سێ ویرە نه‌کەێد یان بنەێده ناو ڕه‌وایه‌تێگ و مردارێیانه‌و بکەید!
زانم هه‌نای بچمه‌و دیارێیان هانه ژێر خه‌روارێ خه‌ڕێ و بانێیان دو سه‌نگ گران قیمه‌ت داپووشاس، له ناو قه‌ورسان گه‌ورایگ-ک داره‌گانێ دار نیین-له‌پسا تک تک بوونه ئاو و چن بڕیشه‌نه ناو ڕاوه‌ن،
ساڵ وارین مه‌ڵۊه له هۊره‌و بوه‌ن و ساڵه‌یل قت قڕان کیسه‌ڵ فه‌رامووش(بکەن)،
ئا ئا چن بڕشیه‌نه ناو ڕاوه‌نا.