شەفەق نیوز/ شار هەولێر پایتەخت هەرێم کوردستان، ئمڕوو چوارشەممە، پێشەنگایگ تایبەت ئەرا شیوەکار کورد "قەرني جەميل" گردە خوەی، ک ٤٦ تابلۆ لەناوی بۊی  شیوەکارەگر لە ساڵەیل ١٩٧٢ تا ١٩٧٨ لە شارەگە دروسیان کردگە، وەرجەیە بان بگرێدە وەر وەرەو دەوڵەتەیل ئەوروپا وەتایبەت ئیتالیا و ئیسپانیا.        

ئەو پیشانگا ک فەرمانگەی هونەرەیل شیوەکاری لەروە وەزارەت رووشنهۊری لە حکومەت هەرێم کوردستان لە هۆڵ میدیا لە شار هەولێر کردەی.    

لەباوەت ئەو هووکارەیلە ک هیشت ئەی ئەرشیەفە بخەێدە وەرچەوز جەمیل ئەرا ئاژانس شەفەق نیوز وت: ئی کەلتوورە لە گشت دەوڵەتەیل ئەوروپا هەس، ک هونورمەنەگە وێنەیل سەرەتای کارەیلی خەێدە وەرچەو،  تا مەردم بنووڕنە گوزەیشتەی هونەریی.    

وتیش: ئەرشیف گەورەیگ دیرێد و خوەشی تیەێد مەردمەگە لەی پیشانگەیلیە بۊننەی.     

هەمیش داوا لە هونەرمەدە گەنجەیلە کرد گرنگی بیەنە کارەیل هونەرییان و ئەرشیفیان، وتیش: شایەت چەن کاریگ دیرم لەدەسم گوما بۊین، و ئیسە خەفەتیان خوەم، ئەراوە تەمەی گەنجەیلە کەم گرنگی بیەنە ئەرشیفیان.  

پیشەنگاگە لەلایەن فەرهەنگ غەفور وەڕیەوبەر گشتی رووشنهۊری و گەنج لە وەزارەت رووشنهۊری لە حکومەت هەرێم کوردستان واز کریا.        

پیشانگاگە لە یەکەم رووژی ئامادەبۊین وەرچەویگ لە دووسەیل هونەر شیوەکاری وەخوەی دی، و تا ماوەی سێ رووژ وەردەوامە.