شەفەق نیوز/ بنەماڵەی شاعر کورد کووچکردگ شێرکۆ بێکەس، ئمڕوو دووشەممە، وتن: زەرەدرەسانن قەور شاعرەگە یا رماننی راس نییە، ودیاری کردن ک ئەو زەرەدەیلە ک وەپی رەسیە وە کارەیلیگ سرووشتی بویە، وباس لە نیازیان کردن ک خوازن ماڵەگەی بکەنە مۆزەخانە.  

هەڵۆ کوڕ شێرکۆ بێکەس لە کۆنگرەیگ رووژنامەوانی لە وەردەم قەور ڕەحمەتی بێکەس و ئاژانس شەفەق نیوز ئامادەی بوی وت: بەشیگ لە مدیایل راگەیانن کوردی باس ئەوە کردنە ک قەور باوگم کەفتیەسە وەر رماین یا زەرەد وەدەس کەسیگ، ودیاری کرد ک لە رواسیەو ئەو زەرەدەیلە وەو گرموهڕ وبەڵاچە رەسیە پی ک پیرەکە لە سلێمانی بوی. 

کوڕ ڕەحمەتی بێکەس وتیش: دویای نووڕین کامیرایل چەودیریکردن وقسەکردن وەرد دەزگا ئەمنیەیلە، دووپات کریا ک چەن زەرەد ئاسانیگ رەسیەسە قەورەگە وەکردەوەی کەسیگ نەویە.

لەباوەت نیاز ئەوە ک ماڵەگەی شێرکۆ بێکەس بکریەێدە مۆزەخانە، کوڕوگەی دیاری کرد ک تەقەلا ئەرا ئەوەگ ماڵەگە  بکریەێدە مۆزەخانە وەردەوامە، وبڕیارە وهاوکاری چەن کەسایەتییگ ناسیار لە سلێمانی بکریەێد.  

شێرکۆ بێکەس شاعر ناودیار کورد لە ساڵ ٢٠١٣ لە تەمەن ٧٣ ساڵان لەناو خەسەخانەیگ لە ستۆکهۆڵم پایتەخت سوید وە بیماری شیرپەنجە دویا کووچی کرد.   

بێکەس لە شار سلێمانی لە ساڵ ١٩٤٠ لەداڵگبوی، وباوگی شاعر ناسیار فایەق بێکەسە.  

شێرکۆ بێکەس هەر لە گەنجیی لە ناوڕاس شەسەیل  چیە ناو کار سیاسی لە بزووتنەوەی کورد، و لە سەرەتای هەفتایل وەگەرد بڕیگ لە ئەدیبەیل کورد بەیاننامیگ دەرکردن لەناوی داوای کار سەردەمیانە ووازکردن ئاسوەیل داهێنان نوویگ لە ئەدەب کوردی کردن.