شەفەق نیوز/ راپۆرتەیل راگەیانن ئاشکرا کردن کە ئابی هنسل کە وەگەرد بریتانی لفی کە ژیانیان وەیەکەو نویسیاس، وەرجە ماوەیگ شوی کردنەسە جۆش بولینگ، کە پەرستارە و جەنگاوەر دێرینە لە سوپا.
ئەو لفانە کە وەیەکەو لەداڵگ بوینە، هەکاتی مەردم ژیان کەن، کە ماشین رانن، و بازاڕ کەن، و مەلەوانی کەن، و دوو سەر و یەک لەش دیرن.
ئابی و بریتانی لە ناودارترین لفانەی جەهانن و هەریەک لەلیان سەر و دڵ جیا دیرێد، وەلێ لەشیان یەکیگە، و دوو باڵ و دوو پا دیرن.
لەی دواییە لەبان سۆشیال میدیا وێنەی سویریان بڵاو بوی کە لە ساڵ ٢٠٢١ وەڕیەو چگە.
پارچە ڤیدیۆییگ کە دیارە لەلای یەکیگ لە میوانەیل سویرەگە توومار کریاس، نشان لفانەگە دەێد وەگەرد زاوا وە دڵنگ سویر ویەکەو سەما کەن.
ئابی و بریتانی ماموستای بیرکاریین لەناو مەکتەویگ لە مینیسوتا.
لە ساڵ ١٩٩٦، لە بەڕنامەی خانمە راگەیانکار ئۆپرا وینڤری دەرکەفتن، و لە روی گۆڤار (لایڤ) وینەیان بڵاو کریا.