شەفەق نیوز- تیم ژنان پاڵایشگاێ گاز ئیلام ک تیم سێیم لیگ ژنان ئێرانە و شەش گلە لە ژن و دۆتەێل ئیلامی ک هانە ئی تیمە، رێ پەیدا کردنە وە نام تیم میللی ژنەێل ئێرانی، وە خاتر کەمدەسی، چەمەڕێ کومەکەێل فرەتر ئی کارخانەێ گەپەنە دە ئیلام.

موعاون وزارەت وەرزش و جەوانان ئێرانیش ک چگەسە ئیلام پامل ئی کارە بییە و وتگە: دە ئیلام، بەش چشتێ کارخانە‌ێل نەفت و گاز و پتروشیمی هەسە ک بایەد جوور گشت دنیا کومەک‌کار تیمەێل و قارەمانەێل ئیلامی ببن.

مەهین فەرهادی وتگە: یانزە لە سەد نەفت و گاز ئێران هن ئیلامە و رەوا نییە ک وەرزشکارەێلە، ئەوەیش وەرزشکارەێل ژن ئیلامی وە دەس پەتی و بێ‌ئمکانات تەمرین بکەن و بچن ئەڕا موسابقاتەێلە.

ئەوی وتگە: بیین شەش دۆت ئیلامی دە تیم میللی تووپان ژنان ئێران و گرتن بەشییە و جەواز چگن وە موسابقات ئوڵەمپیەک وە دەس دۆتەڵەی خوەشنام ئیلامی، ئارمیتا سادقیان، نیشان‌دەر یەسە ک ئەر ئی کارخانەێلە و ئەو دووەێ بەرپرسەێل ئیلامی پێشتگری فرەترێ بکەن، دۆتەێل ئیلامی دە گشت سەرڕێشتەێل وەرزشی ئەتوانن و ئەخوازن و ها بارتێیان ک ملوەنەێل و جیگاێل فرە بەرزترێ دە ئێران و ئاسیا و دنیا بیارنە دەس.