ژنیگ خوازێد بەشیگ لە ماڵە کوینەگەی نووەو بکەێد، و دوو کەس خوازێد ئەرای کار بکەن، خوەییش نیەزانێد کراکارەیل بیناسازی لەکوو وەدەس کەفن، ئەراوە داوا لە براگەی کرد دووان پەیا بکەێد.

براگەی دوو کەس وەرد خوەیا هاورد، یەکیگیان چاخ وباڵا بەرزر، و ئەوەکە لەڕ و کوڵ چماێ بیمارە.

ژن لە براگەی پرسی، کارەگە هن یەی رووژە، ئایا ئی دووانە تویەنن وەی رووژە کارەگە تەواو بکەن؟

براگە وت؛ ئا ئەمروو کار ماڵەگە تەواو کەن، وەلێ ژنەگە وت؛ من گومان دیرم، چوینکە یەکیگیان هاز نەیرێد وەپای خوەی بووسێد، برایش وت؛ نە هویرد نەمینێ ئەمروو تەواوی کەن.

ئەو دوو پیاوە دەسەوکارەو بوین، وەلێ ژنەگە هەر گومان داشت ئی دووانە کاری تەواو بکەن، تا دی تاقەتی نەگرد، کەفتەو ری و چگ تا وەچەو خوەی بوینێد، و رەسیە ماڵەگە، دی نیم کارەگە تەواو کردنە، وەلێ کابرای لەڕ هویچ کاریگ نیەکەێد، تەنیا دەم گونیەیگ ئەرای واز کەێد.

ژن وت؛ دەسدان خوەش بوود کار خاسیگ کردینە، و ئەگەر وەیجویرە کار بکەین ئمڕوو تەواوی کەین، و خوازم خوەراکیگ ئەرادان بسینم، و داوا لە کابرای باڵابەرز کرد وەگەردی بچوودە بازاڕ تا خوەراک بسینێد و بەێدەی دەسی.

لەناو ری، وە پیاوە کراکارەگە وت: ئی کابرای لەڕە چەنە ت کار نیەکەێد، ئەنوی چوی وەیەکەو کار کەین، وت ئی کابرا هاوبەش کارمە، هەرچەگ دراوردیمن کەیمنەی دوو کوتەو.

وت؛ یە چوی بوود؟

پیای وت: رووژیگ ئی کابرا هات تا لەلام کار بکەێد، منیش بەزەییم وەپی هات، وەلێ لەو رووژەو وەگەردم کار کەێد کارمان فرەس.

و هەناێ باسی ئەرا ژنەگەم کردم، ژنەگەم پلەپ گرد قاوی بیەم و دی نەیلم وەردم کار بکەم.

ئی رووژەگە وەپی وتم دی کار لەلای من نەیری، ئەویش وە نک ناهمی چگە ریەو.

لەو رووژەو واز لەلی هاوردم کەسیگ خەر وەمن ئاو نەیا، و هویچ کاریگ ئەرام نەهات.

یەک هەفتە کەفتمە مینەی ئی کابرا تا پیای کردم، و لەو رووژەو گلەو خواردیە دەر ئاسمان لەلیمان وازەو بویە.