کوڵە چیرووک
شوانیگ لەماڵەو دەرچگ، تا خەر و وەرەنیگ بوەێد ئەرا شار، و لەناو شار خەر و بزن بفرووشێد، و وەرەنەگە زەنگوڵ لە ملی بوی.
لەناو ریەگە، سێ دز کەفتنە فتراق دزیکردن، نیشتنە کەینوبەین، یەکیگیان وت: من وەرەنەگە دزم، و ئەوەکە وت: منیش خەرەگە دزم، سێیەمەگە وت: هویچیگ ئەرا من نەیشتین، مەگەر رویتیەو بکەن و پڕتاڵەیل وەری بدزم.
یەکەم دز، وە دزیەو چکە نزیک وەرەن، و زەنگوڵ ملی کەنی، و بەسادەی دوی خەرەگە، و وەرەن رفان.
کەمیگ وەپی چگ، کابرا وەری کردە پشت خوەی، و نووڕی کە وەرەن نیەسەی، و کەفتە مینەی.
دز دویەم خوەی نشان دا، و لە کابرا پرسی، یە مینەی چە کەی؟
کابرایش وت: دیارە وەرەنەگەم دزیا، و کەفتمەسە مینەی.
دزەگە وت: وەرەنیگ وەرد کەسیگ دیم، وەرەو ناو ئەو دارستانە چگن، و وە ئاسانی توەنید پەیای بکەی.
کابرا وە دز وت: ئی خەرە ئەرام بگر، تا بچمە پەیاکرد بزن.
دزیش؛ ئەرا خوەی خەرەگە دزی.
هەناێ کابرا لە دارستان هویچیج پەیا نەکرد، وە نک ناهمی گلەو خوارد، و دەسکردە بووڵەبووڵ و کەفتە ری.
لەناو ریەگە، لە کنار گوڵەم ئاویگ، سێیەم دز، لە کەنار ئاوەگە نیشتیە گیرێد، کابرایش لە دز پرسی یە ئەڕا گیرید؟
دزەگە وت: یەی کیسەی پڕ لە تڵا وەپیم بوی، و هاتم لەلای ئی گوڵەمە هوچانیگ بخوەم، و تەز پام درارم، و چەمیامەو تا گوپیگ لەی ئاوە بنووشم، کیسەی تەڵا کەفتە ناو ئاوەگە.
کابرا وت: ئەی ئەڕا نیەچیدە ناو ئاوەگە و تەڵاگە درارید؟
دزەگە وت: من رخم چوود لە ئاو، و مەلەوانی نیەزانم، وەلێ هەر کەسیگ کیسەی تەڵاگە ئەرام درارێد، من بیس پارچەی تەڵا وەپی دەم.
کابرا دڵی خوەشەو بوی، کە لەجیای خەر و بزنەگەی تەڵا کەفێدە دەسی، پڕتاڵەیلی لەوەر کەنی، و داوەزیا ناو ئاوەگە.
هەناێ لە ئاوەگە دەرچگ، نە خاوەن تەڵا لەورا بوی، و نەیش پڕتاڵەیلی.