تەمام ڕووژ کاڕووی دڵێ ژان کرد و ئاشاز لێ بریاۊد.دەم لەدەم شنەفتۊد کە لە قڵازەنجیر، لەناو ئشکەفتێ بێ ڕێ و ڕەوەن، حەکیم زاناێگ، دۊر لە هلاهلای خەڵک، ماوا گرتێیە و گاجار وەدەم و نەفەس پاک خوەی، تاکەکەسانێ دەرمان کەید.

کاڕووی وەلەک دا وە گەز و خوەی لە بەرزی تاش کیشا ئەوبان. چەوێ کەفت لە پیرێگ لە وێنەی زاڵ زەرهانی، پرچ چەرمێ و چەو سەوز و ڕیش تا زرانی...

کاڕووی وەکزێگەو، وەئەدەب لە وەرایوەر پیر، چوارمەخشی نیشت و دەنگ نەکرد. پیر لە کۊزەیگ ئاو ڕشانە ناو کاسەی چووینێگ و نا وەردەس ڕووی...

ڕووی یەی هناس ئاو هەڵکیشا و لەشوون ئەوە وە بەلەمرک دەمێ سڕییەو.

پیر پرسیار کرد کە ڕووی چۊ هاتێیە و مرادێ چوەس.

کاڕووی وە دەنگ گیریایگ وەت:

 -ئەی پیر و گەورای ئەڤداڵان، ساڵگار فرەیگە دڵم ژان کەی و هەر شەو لە وەقەم، مەلان ڕەم کەن و ئاسگەیل خەو نەیرن، جوزم لە گیان خوەم و ڕووژی هزار جار لە خودا مەرگ تووام...

پیر وەت: کاڕووی بچوو لە دەرەنگاوێ یا دراوێگ یا دەروەنێ کە تا ئلان لەو دەروەنە نەڕییاۊد، قەپێگ خەڕگ تازە بار تا دەرمانت بکەم...

کاڕووی چمان هەفت پا و هەفت دەس قەرت کرد و لە ئشکەفت دا ئەودەر...

ساڵان جور تووز شوون ڕییەن لە دەیشت و دەر گووم بۊن و هەتەرێ لە کاڕووی نەۊ...

ڕووژێ پیر لە دەر ئشکەفت دانیشتۊد و تماشای دنیا کرد و بەزەخەنەیگ بان لێوێ پووشاۊد،

لە پاتاوە دەنگ هاوار کەسێ هات، بەڵام هۊچکەس لە هاوارێ نەچێ...

پیر دەنگ کاڕووی ژنەفت کە لەپسا وەت:

-هەی باوگ ئەڤداڵان، وڵاتان پەی کردم و گەردیم، لە مڵک ئەوقان تا ماوای مووسڵ، لە دەلیای نیل تا وڵات ئافرەتان شەڕجو، لە کۊەگان زاگروس تا وڵات ئاگرپارێزان، نە دراوێگ دیم و نە دەروەنێ کە من لە تێ نەڕییاۊم...چوە بکەم ئڕا ئێ ژان دەرۊنمە!؟ هاوار و سەد هانا!!!

پیر دو کلگ وەرەو ڕووی نیشانە گرت، ڕووی خڕخوارد و زوو خوارد و چمان گەردڵەچۊچان چێ لە ئاسمان و تەنۊرە کیشا و هەتەرێ لێ نەمەن...

پیر زەردەخەنەیگ کرد و تەک دا لە سان بەرزێگەو...

ت وەتی ڕووی لە داڵگ نەزای!!!

فەرهاد ئیزەتیزادە