شەفەق نیوز/ هویچ وەختیگ نەخوازیمە گیس خوەم بووڕم، و قەت ئی کارە نیەکەم.

وەیجویرە "ئاشا ماندیلا" باس ئەوە کەێد ک جوین خوەشی لە گیسی تیەێد، ک رەسیە درویژییگ پەیمانەیی، تا ئەو شمارە شکان ک لەناو کتاو گینیس توومار کریایە.

ئەو ژن ئەمریکیە، رەسیە تەمەن ٦٠ ساڵی، و یە ٤٠ ساڵە گیس خوەی نەوڕیە، تا تاڵەیلی رەسینە ٣٣،٥ مەتر.

گینیس ناو ماندیلا توومار کرد، ک شمارەی پەیمانەیی جەهانی ئەرا درویژترین گیس ژنانە لە ساڵ ٢٠٠٩ شکان، ک ئەو مەوقە درویژی پەلگی رەسیە تەنیا ١٦ مەتر، و کتاوەگە ئویشێد ئەو ژن ئەمریکیە تا ئیرەنگە لە شکانن شمارەیل وەردەوامە.

ماندیلا لە شاد کلیرمۆنت لە ویلایەت ئایوا داکاسیایە، و ئویشێد وەرجە ٤٠ ساڵ هەنای لە ترینیداد و توباگو هاتیەسە ئەمریکا تا ئمڕوو گیسی نەوڕیە، وپەیمان وە خوەی داگە ک یەک تاڵیش لە گیسی نەوڕێد.

ماندیلا ناچار بوود گیسی لەناو بوخچەیگ هەڵگرێد، ک وەتەناف پەڕوو بەسێدەی تا ناێدە بان زەوی وملی شەکەت نەکەێد، چوینکە ئەو گیسیە کیشی سەنگینە.

وەگەرد ئەوەیش، ئەو خانم ئەمریکیە باس گیسی کەێد ک جویر تاجیگ شاهییە لەبان سەری، و نشان دڵخوەشیی وەوە دەێد و رکدارە ژیانی تەواو بکەێد وەبی وەکارهاوردن قەیچی لەبان گیسی.

ئەوەگ ئەڵاجەوییە ک شویەگەی ماندیلا کار لە جوانکاری قژ ژنەیل کەێد، و هویچ ناڕەزاییگ لە رەفتار ژنەگەی نەیرێد، بەڵکم دەسمیەتیی لە شانەکردن گیسی دەێد.