شەفەق نیوز/ هەرێم کوردستان بڕە لە شوینەیل گەشتوگوزاری، و هەرچەن دەیان لە شوینەیل وەناوبانگ هەس ک گەشتیارەیل خوەشیان لەلیان تیەێد، باوجی فرە شوین هەس هیمان نەڕەسیەسە ناوبانگی.
تاڤگەیل کانیەڕەش و بەرژە لە باکوور پارێزگای هەولێر پایتەخت هەرێم کوردستان، شوین گەشتوگوزاری رەنگینیگە، وە تونێلەیل یەخینی ک ئاوەکە لەناو کوێەیلە کەنیەسەیان، و کەشوهەوای دڵگیری ک پلەی گەرمی لەناوی لە سەختترین رووژەیل تاوسان لە ٢٠ سەدی رەد نێکەێد.
نادر روستی قسەکەر دەزگای گەشتوگوزاری لە هەرێم کوردستان ئەرا ئاژانس شەفەق نیوز وت: پلەی گەرمی لە تاڤگەیل کانیەڕەش هالە ناونی ١٥ تا ٢٠ پلە، و ئەراوە فرە لە هاووڵاتییەیل لە گەرمی تاوسانەگە روی وەرەو ئەو ناوچەیلە کەن تا دڵیان وەو دیمەنەیل رەنگینە و کەشوهەوای سەردە خوەشەو بکەن.
روستی هووشداری دەێد ک بابەتە لەو تاڤگەیلە مقەیەتی بکریەێد ک شایەت تونێلە یەخینەیل ئەگەر یەخەگە تاویاوە بڕمیەن .تاڤگەیل کانیەڕەش و بەرژە، رویکردن گەشتوگوزارین ئەرا دڵخوەشی وە دیمەنە سرووشتیەیل و گرتەیل یادگاری لە تونێلە یەخینەیل.