کوڕیگ چەوی کەفتە دویەتیگ فرە رەنگین، وهات لەلای باوگی پا کوتا زەوی و پەڵپ گرد بچوودە خوازمەنی ئی دویەتە ئەرای، و وت: باوگە دویەتیگ ئەقرە رەنگین و جوانە، چگەسە ناو دڵم، و خەفتن لە دیەیلم دزیە.

باوگە وت: کوڕم بایەسە وەچەو خوەم ئی دویەتە بوینم، تا بزانم چوینە،وەرجەیەگ بچیمنە داوای.

باوگ و کوڕ کەفتنە ری، تا دویەتە بوینن، باوگ هەگ چەوی کەفتە ئەو چەوەیل سەوزە و ئەو رەنگ هویل و گیس زەردە، وت: کوڕم نەبایەس ئی دویەتە شوی وە کوڕیگ جویر تو بکەێد، وەلێ پیاییگ بفام و دنیا دیدە خوازێد، یە ئەرا خوەم خاسە، بیلەی ئەرا خوەم.

کوڕ چگە گژ باوگی، و بویە وەردەوەردە و دەمەقاڵیان، تا یەی پیاییگ کە لەناو مەردم وە دانایی ناسیاس، هاتە ناوجیکردن باوگ و کوڕ، و نیشتن ئەرا پیای دانا باس کردن، و دانا وت: بایەسە ئەو دویەتە کە لەبانی بویەسە جەنگ وەچەو خوەم بوبنمەی، تا بزانم کی تاوانبارە.

کەفتنەو ری، پیای دانا چەوی کەفتە دویەت، تەکانیگ لە شوین خوەی برد، و چەویگ پرتان، و وت: ئیوە هن ئیجویر دویەتیگ نیین، چوینکە هویچکامدان ئەرای نەپووڕیاس، یە هەر خوەم ئەرای خاسم، بیلەی ئەرا خوەم.

باوگ و کوڕ و پیای دانا بویە جەنگیان، و قاڵیان رەسیە پولیس، وگشتیان ئەرا لای ئەفسەر پولیس بردن، و لەورا باس وەسەرهات خوەیان کردن.

ئەفسەر وت: یە چ دویەتیگە کە هەرسگدان وەیجویرە لەبانی جەنگ کەین؟، بایەسە وەچەو خوەم بوینمەی.

ئەفسەر هەناێ چەوی کەفتە باڵای دویەت، سیوڵیگ ئەرای جەڕەو دا، و وت: یە کەی ئەرا نەگەیلیگ جویر ئیوە بوود، کەسیگ لەخوەم زیاتر ئەرا ئی دویەتە نەپووڕیاس، بیلەی ئەرا خوەم.

کار باوگ و کوڕ و پیای دانا و ئەفسەر پولیس رەسیە لای وەزیر، و گشتیان لەلای وەزیر گردەو بوین، و باس خوەیان ئەرای کردن، وەزیریش وت؛ بایەسە ئی دویەتە وەچەو خوەم بوینم.

وەزیریش وت: بیلەی ئەرا خوەم، تا کارەگە رەسیە لای پاتشا.

پاتشا وت: بایەسە ئەو دویەتە بارین تا بوینمەی، و چەن کەسیگ  کل کرد و دویەت هاوردن ئەرا لای پاتشا.

پاتشا وت: ئی دویەتە تەنیا ئەرا پاتشا خاسە، بیلەی ئەرا خوەم.

لەی قاڵ و مرافە، سڵا کەفتە لای دویەت، دویەتیش وت: سوو لە بیاوانیگ، گشت ئیوە لەبان کڕیگ بووسیەن، منیش چەن گامیگ لە نوای ئیوە، ئیجا من دەو کەم، ئیوەیش لە شوین من دەو بکەن، هەرکامدان یەکەم کەس من گرد، شوی وەپی کەم.

بویە سوو، و گشتیان لەبان کڕ وسیان، و دویەت نادە دەو، یانیش کەفتنەو شوینی، وەلێ دویەتەگە چاڵ گەورەیگ ئەرایان هەڵکەنوێد، و بانی پووشاوێد، تا دیار نەێد، وەبان ئەو چاڵەو رەد بوین، گشتیان کەفتنەو چاڵ.

دویەت هات لەبان سەریان وسیا، و وت: ئیوە من ناسین؟

من وەپیم ئویشن: دنیا.