شەفەق نیوز/ پیاویگ ئەمریكی دۊای زیاتر لە 80 ساڵ وازهاوردن لە خوەنستن، بڕوانامەی قۆناغ ئامادەیی وەدەسهاورد. 

زنجیرەی مەکتەوەیل كانتۆنی جێفرسۆن لە ویلایەت ڤیرجینیای خوەرئاوا راگەیان، مێریڵ پیتمان كووپەر لە ساڵ 1930 چگە كۆلێژ ستۆرەر ک ئەو وەختە یەكیگ بۊیە لە مەکتەوەیل ناوچەگە، باوجی دۊاجار  لە ساڵ 1938 ک دۊا ساڵ خوەنستن قۆناغ ئامادەیی كووپەر بۊیە، 

خوەی و داڵگی لەوەر گەنی بار داراییان ماڵیان بردنە ئەرا   فیلادێڵفیا، واز لە خوەنستن هاوردیە.

وەگورەی سەرچەوەگە، ساڵ 2018 كووپەر سەردان كۆلێژەگەی كردیە و نیگەرانیی خوەی نیشاندایە چۊنکە نەتوەنستیە خوەنستن ئامادەیی تەواو بكەێد، ئەوەش بۊیەسە دەستپێک تەقەلای خێزان و دوسەیلی وەگەرد زنجیرەی مەکتەوەیل كانتۆنی جێفرسۆن ئەرا ئەوەگ ناوبریاگ دەس وە خوەنستن بکەێد. 

ماڵپەڕ “upi” هۊردەکاری چیرۆكەگەی بڵاوكردیە و ئۈشێد، “تەقەلایەل ئی مانگە رەسینە ئەنجام و كووپەر بڕوانامەی دیبلۆم فەخریی وەدەسهاورد”. 

بۆندی شای گیبسۆن سەرپەرشتیار زنجیرە مەکتەوەیل كانتۆنی جێفرسۆن، لە ئاهەنگ دەرچگن خوەنەوارە تەمەن 101 ساڵانەگە راگەیان، “وە وەدەسهاوردن ئی بڕوانامە، بەڕێز كووپەر بۊیە خاوەن بڕوانامەی قۆناغ خوەنستن ئامادەیی، دڵخوەشیمن وە ئەوەگ بەشێگیمن لە جیوەجیکردن ئی خەونە”.