لەیرا ئەڵاجویترین رویداوەیلیگ لە ساڵ ٢٠٢٢ ک گیان چەن کەسیگ وەپی رفیاگە.
کەوش سڕانەکی
کوڕیگ لە مەکتەو "سانت لوک" لە ویلایەت کۆناتیگت ئەمریکا، وەناو تیدی بالکیند، کەفتە وەر رویداو خەفەتداریگ، ک گیانی لەدەسدا.
هەنای تیدی ١٦ ساڵان، مەوقەی بەشداریکردنی لە بازی هۆکی، کەفتیوێدە بان یەخ، قول برادەرەگەی بەرزەو بوێد، و کەنار کەوش برادەرەگەی مل تیدی بڕێد، ک دویای کەمیگ لەناو خەسەخانە گیانی لەدەسدا.
سەرچەوەیل وتن: تیدی ئەو پارچە وەدەور مل خوەی نەنایە ک مەرجە گشت بازیکەرەیل بیەنەی دەور مل تا مقەیتییان بکەێد.
ماشین، چەقوو، پۆدرەی پرۆتین
هەرچەن رویداو ماشینەیل لە یەکەمین ١٠ هوکارەیل مردن لە جەهان نیین، وەلی فرە باوە.
مردن پیاویگ نەناسیاگ لە ویلایەت کالیفۆرنیا سەرسام خەڵک ناوچەگە کرد، ک وەگورەی راپۆرت پولیس، پیاوەگە ماشینیگ "ليگزس" لە وەخت فرە زوییگ لە شەوەکیانیگ رانیە، و وەناکاوەو ماشینەگە تەکان وەرەو دەس راس داگە، و داگەسە ماشینیگتر ک لەکنار ریەگە وسیاگە.
وەگورەی رووژنامەی "تايمز أوف ساندييگو" ماشین ئەو کابرا زەرەد وە پەنج ماشین رەسان، و پباوەگە هەر وە تونی ماشینەگەی رانیە، و هویچ تەقەلای وساننی نەیاگە.
پولیس دووپات کرد ک رانندەگە وە مردگی بریا خەسەخانە، و لەورا دەرکەفت ک ملی وە چەقوو زەخمدار کریاگە، و کوشینەیل ماشینەگە وە خوین پلگیانە و خوینەگە وە پۆدرەی پرۆتین تیکڵا بویە، و هەمیش چەقوویگ لەناو ماشینەگە پەیا کریا.
پولیس وت: هاتێ ئەو پیاوە خوازیە پۆدرەی پرۆتین وە دەم چەقوو بخەێدە ناو لیوانیگ ئاو، باوجی سەر لەلی شیویاگە و ماشینەگە لەدەسی دەرچگە، تا بەید لە ماشینیگتر، ئیجا ئایەرباک ماشینەگە کەفتیەسە کار، و تەکان چەقووەگە ئەرا ملی داگە، و چەقووەگە کوشتیەسەی.
وای هەلیکۆپتەر
داپیرەیگ وەناو جان لیگان لە تەمەن ٨٧ ساڵە، لە ئادار ٢٠٢٢ مەوقەی ریکردنی وەگەرد دویەت خوەشکەگەی لەناو گەراج خەسەخانەی "ديريفۆرد" لە بیلموت ئەنگلنترا مرد.
لە هویردەکاری، هەلیکۆپتەریگ نیشتە شوین نزیکیگ لە خەسەخانەگە، و تەکان وای هەلیکۆپتەرەگە کەیوانوەگە و خوارزاگەی خستە بان زەوی.
کەیوانوەگە سەری زەخمدار بوی و وەکوتپڕ گیانی لەدەسدا، و خوارزاگەی تویش شکیان هات.
مەلەوانگە قویتی دا
رووژنامەی "واشینتۆن پۆست" وت: گەنجیگ وەناو "كليل كمحي" مکیس ئەرا سەیرانیگ لە پشوو کۆتایی هەفتە وەرد هاوڕیەیل کاری لەناو ڤیلایگ لە ئیسرائیل کریا، هەنای کلیل چیە ناو مەلەوانگە، بن گوڵەمەگە رمیا، و ئاوەگە کلیل وبرادەرەگەی وەرەو بن کیشا، و برادەرەگەی خوەی قورتار کرد، وەلی کلیل ئەرا قویلی ١٠ مەتر قویت دریا.
مەرگ ئەڵاجەوی دیبی کولێر
لە ئەیلوول ٢٠٢٢، رویداوەیل ئەڵاجەویگ تەرم ژنیگ وەناو دیبی کولێر لە تەمەن ٥٩ ساڵە لە ویلایەت جۆرجیا ئاشکرا کردن.
وەگورەی رووژنامەی "نيويۆرك پۆست" ئاماندا دویەت دیبی سەوقاتیبگ نادیار وە ٢٣٨٥ دۆلار ئەرای هات، و ناو ئەو کەسە ک کلی کردیە وەگەردی نییە، وەلێ پەیامیگ وەگەردی هاتیە ئویشێد: «ری وەپیم نیەن تا بچم.. دووسد دیرم.. کلیلیگ هاناو گوڵدانەگە لە نزیک دەرەگە»، ک دی ئاماندا وەوە زانست ک پەیامەگە لە داڵگی هاتیە.
دویای نیمەڕو، دەرکەفت ک دیبی جانتای سووریگ و پارچە پەڕوو کەویگ و پاڵتاویگەو فەندەکیگ لە دوکانیگ سنیە، لە دویاترین دەرکەفتنی وەرجەیەگ گوما بوود.
ئی رووژەگە، خانەوادەی دیبی ئاگادار پولیس وە بیسەروشوینیی کردن، و پولیس ماشینەگەی دیبی لە نزیک داریگ پەیا کرد و جانتا سوورەگە کریاسە قەی دراەگە، و پەڕووە کەوەگە لە شوینیگ نزیک سزیاگە، و تەرم دیبی چەن مەتریگ دویرە ک وەڕویتی کەفتیە و دەور زگی سزیاگە، و داریگ بویچگ وە دەسی گردیە.
وەگورەی فۆکس، پولیس گومان کرد ک دیبی کوشیاگە، وەلێ دویەتەگەی وت شایەت خوەی کوشتیە، چوینکە لە هەفتەیل دویایین واز لە چشتەیل خوەی هاورد، و زیان لە دڵتەنگی فرەیگ داشت.
جیڤری کوڕ دیبی، ئەرا رووژنامەی "ئیندیبندنت" وت: داڵگی ئەو کەسە نییە ک لەناو کامیرایل دوکانەگە دیار دەێد، و دووپات کرد ک ئەو کەسە لەناو کامیرایل داڵگی کوشتیە.