دویاترین تەقینەوەی گڕکان "کامپۆ فلێگری" ک کەمتر ناسریاگترە لە گڕکان ڤیزۆڤیۆس ک نزیکەی دوو هەزار ساڵ وەرجە ئیسە پۆمپیای لەبان نەخشەگە سڕییەو، میژووەگەی چوودەو ئەرا ساڵ ١٥٣٨ و ئی گورجی گڕکانە سەدان هەزار کەس خەێدە وەر لافاو ئاگر و مژ سەنگەیل، وەپەی ئەوەگ ئاژانس هەواڵی فەرەنسی بڵاوی کردگە.

ئی توێژینەوە لەلایەن زانکۆی "UCL" لە لەندەن و پەیمانگای جیۆفیزیک و گڕکانناسی ئیتاڵی ئەنجام دریاگە، ستیفانۆ کارلینۆ، هاوکار لەنویسەر توێژینەوەگە ئویشێد: "ئەو گڕکانە گڕکانیگ فرە رخبەرە".

لای خوەییش؛ ئەو توێژەرە سەرپەرشتی توێژینەوەگە کەێد، کریستوفر کیلبورن، لە زانکۆی "UCL" لە بەریتانیا ئویشێد: "ئیمە نیەویشیمن تەقینەوەیگ بوود، باوجی ئویشیمن مەرجەیل ئەرا ئەوەگ یە رویبیەێد فرەترەو بوون".

ئی گڕکانە وزەی تونیگ هاناوی، تا ئەو ئاستە ک تەقینەوەی ٣٠ هەزار ساڵ وەرجە ئیسە بویە هوکار فەوتان ئایەم نیاندەرتاڵ، وەپەی بڕیگ نووڕین، گورجەوبوین نوویگ لە سەرەتای هەشتایل سەدەی گوزەشتە بویە هوکار چووڵکردن ٤٠ هەزار کەس، بەڵام لەو مەوقە  تا ئیسە باس گڕکانەگە نەکریاگە.  توێژینەوەگە دیاری کردیش ک دەیان هەزار زەویلەرزەی بویچک لە ساڵ ١٩٥٠ دەریاچە گرکانیەیل کەمەو کەن، و فرە لەلیان چگە، و نزیکە بڕەسێدە خاڵ رمیان.

 ئی زەویلەرزەیلە ک لە ساڵ ٢٠١٩ەو شمارەیان زیای کردگە، چینەیل ژیر زەوی نائارام کردگە و ناوچەی پۆیۆلی ک گڕکانەگە هابانی وەدرەیژایی دەیان ساڵ چوار مەتر بەرزەو بویە.

لای خوەیانیش توێژەرەیل باس ئەوە کەن ک کاریگەریی گورجی گڕکانەیل کەڵەکە بوینە، ئەراوە نەبایەس هاز ئی چالاکییە وەشیوەیگ وەرچەو زیای بکەێد، تا ئەگەر تەقینەوەی گڕکانیگ زیای بکەێد.

هەرلیوا، توێژەیل وتنیش؛ "هاتێ وەرجە تەقینەوەی گڕکانیگ نشانەی فرە کەمیگ بوود، جویر ئاست کەمییگ لە بەرزەوبوین زەوی و شمارەیگ کەمتر لە زەویلەرزە ".