شه‌فه‌ق نيوز/ شانديگ چينى پيكهاتگ له شاره‌زايه‌يل ئه‌را روێ روێ بوينه‌وه‌ى ڤايرۆس كۆرۆناى تازه ره‌سيه شار سلێمانى له هه‌رێم كوردستان و ده‌سميه‌ته‌يل پزيشكى ئه‌را هه‌رێ وه‌ل خوه‌يا هاورد وه‌خاتر له‌ناوبردن ڤايرۆسه‌گه ك سه‌رچه‌وه‌گه‌ى چين بوێ و له جه‌هان بڵاوه‌و بوێ.
وانگ جى هۆنگ جيگر كونسوڵ چينى له هه‌ولێر سه‌رۆكايه‌تى شانده‌گه كرد ك شماره‌يگ له پزيشكه‌يل تايبه‌تمه‌ند له بوار له‌ناوبردن ڤايرۆس كۆرۆنا گرته‌سه خوه‌ى، جوور ئه‌وه‌گ په‌يامنێر شه‌فه‌ق نيوز ئاماژه وه‌پيكرد.
بڕياره ئى تيم پزيشكى چينيه ده‌سميه‌ت پيشكه‌ش وه ده‌سڵاته‌يل ته‌ندروسى له سلێمانى و باقى ناوچه‌يل تر كوردستان بكا له‌وه‌ر زاڵبوين له بڵاوبوينه‌وه‌ى ڤايرۆس كۆرۆنا له هه‌رێم.