شەفەق نیوز/ شار هەولێر پایتەخت هەرێم کوردستان، ئمڕوو چوارشەممە، چالاکیەیل جیوازیگ لە رووژ دڵنگ کوردی وەخوەی دی.
ئامادەبویویل ئاهەنگەگە هەڵپەڕکە لەناو سەیرانگەیل و شوونە گشتیەکان کردن، و گەنجەیل لە کوڕ و دوێەتەیل دڵنگ کوردی لەوەر کردن.
حکومەت هەرێم کوردستان، رووژ دەی ئادار ئەرا رووژ دڵنگ کوردی بڕیار دا.
لەی رووژو خوەنەوارەیل زانکۆەکان لە دەوام فەرمی و لە کارەیل خوەیان وەی بۆنە دڵنگ کوردی کەنە وەر.
هۆکەر محمد ک خوەنەوارە لە زانکۆ، ئەرا ئاژانس شەفەق نیوز وت: ئەیە رووژ خوەشیگە و رووژیگە ئەرا کەلتوور کوردی نەک تەنیا ئەرا دڵنگ کوردی.
وتیش؛ بایەدە شانازی وە دڵنگ خوەمان بکەیمن ک لە جیوازمان لەو گەلەکان کەێد، و وە شیوەگ مقەیەتی زوانەکەمان کەیمن بایەدە مقەیەتی دڵنگمان بکەیمن.
لەلای خوەییش هاووڵاتییگ وەناو محمد حەمید ئەرا ئاژانس شەفەق نیوز وت: ئی رووژە بۆن خوەشیگە، و بایەدە بان لەوەرکردن دڵنگ کوردی تەنیا لەی رووژە نەوود.