شەفەق نیوز/ بازاڕەیل شار سلێمانی جویلەی گەورەیگ کەفێدە ناویان، وە ئامادەکاری ئەرا پیشوازیکردن لە جەژن قوربان، لەوەختیگ ئیدارەی پارێزگاگە پلان توکمەیگ ئەرا پشوو جەژنەگە دانایە. 

پەیامنێر ئاژانس شەفەق نيوز وت: بازاڕەیل سلێمانی و ناوەندەیل بازرگانیی ئی رووژەیلە وەگەرد نزیکبوین جەژن قوربان جویلەی خاسیگ کەفتیەسە ناویان، ک خەڵکەگە ئامادەی خوەیان ئەرا پیشوازیکردن لە جەژن کەن وە سەنین پڕتاڵ وشیرینی و خوەراک ئەرا جەژن.  

ئەرکان محمد، فەرمانبەر حکومەتیە، ئەرا ئاژانس شەفەق نیوز ئویشێد: خیزان کورد چاشیایە ک وە ئامادەکاری جیاوازیگ پیشوازی لە جەژن بکەێد، وهاتێ رەوش ئابووری کاریگەری لەبان ئەو ئامادەکاریە بیاشتاد، ک لە ساڵەیل گوزەشتە قەیران مووچەیل قەیرانیگ ئابووری دروس کرد، باوجی ئی ساڵە، وەرجە دوو رووژ مووچە هاتیە، وبەشیگیش وەرجە جەژن مووچە وەرگرێد، وەلێ ئمساڵ نرخەیل چینە بان، وخەرج خیزان عراقی لەوەر گرانی چشتەیل سەرەکی زایایەو بوی، ئەراوە رخمان لەوە چوود ک بوودجەی مانگانە ئەو ئامادەکاریەیلە بشیونێد.  

مەروان ئەحمەد خاوەن دوکان چشتەیل کولیچە، ئەرا پەیامنێر ئاژانس شەفەق نيوز ئویشێد: بەرزەوبوین نرخەیل گوناه خاوەن دوکانەیل نییە، وەلێ کرای ماشین لەوەر گرانی سوتەمەنی بەرزەو بویە، ئەوەیش وەگەرد ئارامگردن نرخ دۆلار لەبان ١٤٨٠ دینار، وگرانی بەشیگ لە چشتەیل لەوەر جەنگ رووسیا و ئۆکراینا، ک گشت ئەوانە هیشتن گرانی بوود.   

مەروان دووپات کرد ک وەچەو ساڵەیل گوزەشتە جویلەی بازاڕەگە خاسە، چوینکە وەرجە جەژن قوربان مووچە بەشەو کریا، و گەشتیارەیل لە سەرەتای ئی هەفتە هاتنە سلێمانی چوینکە گەشوهەواگە هوونکە.  

هەرلیوا، دەسەی ئاسایش باڵا لە پارێزگای سلێمانی، فەرمان وریکارەیل نوویگ ئەرا رووژەیل جەژن قوربان دەرکرد، و قەیەغەی سەربڕین ئاژەڵ و قوربانی لە دەیشت کوشتارگایل فەرمی کرد.    

ئەوەیش وەگەرد جیوەجیکردن ریکارەیلیگ تەندروسی ئەرا نواگردن لە بڵاوبوین کولێرا وتەو خۊنوەربۊن، ئەرا مقەیەتیکردن تەندروسی هاووڵاتییەیل لە سلێمانی.