شەفەق نیوز/ خالد شوانی وەزیر داد عراق، ئمڕوو سێشەممە، واژوو لەبان تەمەیل دەسەی فەرمان دیوانی (33 ئەرا ساڵ 2019) کرد کە تایبەتە وە لاوردن کاریگەرییە بەدەیل لەبان کوردەیل فەیلی، لەوانەگ زەوی و ماڵیان وەلایەن رژیم لەناوبریای وەرجە ساڵ ٢٠٠٣ زەفت کریاس.
وەگورەی بەیاننامەی وەزارەتەگە، شوانی فەرمان دەرکردن گشتگیری ئەرا گشت پیکاتەیل وەزارەتەگە کرد تا بەیاننامەی فەرمانبەرەیل لە کوردەیل فەیلی بیەێد، و قسە وەرد وەزارەت دارایی/ فەرمانگەی عەقارەیل دەوڵەت بەش زەفتکردن بکەێد تا ئەویش ئەو عەقارەیلە کە وەرجە ساڵ ٢٠٠٣ دەسوەبانیان نریاس یا زەفت کریانە بیەێدە فەرمانگەی توومارکردن عەقاری، تا هن ئەوان جیاوە بکەێد.
بەیاننامەگە دیاری کرد کە وەزیر داد فەرمان دروسکردن یەکیگ دا سەروە بەش کاروبار هاوڵاتیەیل، ئەرکیان وەرگردن و وەشوینکەفتن ئەو داواکاریەیلە بوود کە وەلایەن کوردەیل فەیلی پیشکەش کریانە.
هەمیش فەرمان دادە بەش راگەیانن و پەیوەندی حکومەتی لە وەزارەتەگە ئەرا ئاگادارکردن بەش کاروبار هاوڵاتیەیل وە وەرگردن داواکریەیل کورد لەباوەت عەقارەیل زەفتکریای وەرجە ساڵ ٢٠٠٣، ئەرا مسۆگەرکردن مافیان وەگورەی دەستوور.