خوەنەوارەیل لەی فیستواڵە لە وەرجەسەکردن سروشت ناوچەگە سەرکەفتگ بوین، هەرلیوا، توانای خوەیان لە ئامادەکردن خوەراک و گریەداین ئیسە وە گوزەشتە وەو کەرەستە و چشتەیلە نشان دان ک خێڵ و بنەماڵەیل کورد لە وەختە جیاوازەیل وەکار تیەرن.

پەیامنێر ئاژانس شەفەق نیوز، ک بەشداری چالاکیەیل فیستواڵەگە کرد، وت؛ چەن پەرەگراف جیاوازیگ لە فیستواڵەگە جیگر کریانە، ک وە گۆرانی فۆلکلۆری کوردی دەسوەپی کرد، لە وەختیگ   پێشانگای هونەری بەشیگ سەرەکی چالاکیەیل بوی.

سامی محەممەد، مامووستای یاریدەر لە فیستواڵ خوەنەوارەیل، ئەرا ئاژانس شەفەق نیوز وت: "خوەنەوارەیل  وە بڕیگ تابلۆ بەشداری کردن، ک فرەیان دیمەنیل رەنگین ناوچە جیاوازەیل هەرێم کوردستان وەرجەسە کەن، بیجگە  تابلۆیل  پرتاڵ فۆلکلۆر و چشتەیلیکتر".

فیستواڵەگە خواردنە دیارەیل کوردیش لەناوی بوی، جویر  ئەوەگ ساوین مەعروف، ئەرا ئاژانس شەفەق نیوز وت: "ئی خواردنەیلە لەلایەن خوەنەوارەیل  دروس کریانە،   خواردن جیاواز هاناویان، وەگەرد نشاندان شیوازیلی لە ناوچەیل هەرێم، جویر  (دۆلمە)، ک جیاوازە لە شبواز ئامادەکردنی لە هەولێر لە قەزای کۆیە و لەو ناوچەیلتر، هەرلیوا، خواردنەیلیگتر جویر  بریانی و کفتە و بریگتر.

هەرلیوا، فيستواڵەگە سازین پێشانگای میرات و کەرەستەیل کوینە وەخوەی دی، وەگورەی قسەی خوەنوار سروە قادر ئەرا ئاژانس شەفەق نیوز، ک وت: "فیستواڵەگە بڕیگ فرە لە ناوماڵەی کوین لەناوی بوی، بیجگە لەو ئامێرە کوینەیلە  ک خێڵە کوردەیل لە کشاوەرزی و ئەرک رووژانە وەکاریان هاوردنە" جویر کەلوپەل و (سەماوەر) و چشتەیل کوینەی جویراجویر. قادر وتیش: "دانیشتن جەماوەری ئەرا دروسکردن نان نەریتی کوردی، یەکیگ بوی لەو چالاکیەیل فیستواڵەگە وە بەشداریکردن خوەنەوارەیل فرەیگ".