شەفەق نیوز/ پۆلیس پارێزگای هەولێر، ئمڕوو یەکشەممە، راگەیان دەسگیرکردن ژمارەیگ لە توومەتبارەیل وە پەلامارەگان دژوە گەشتیارەگان لە وەردەم فامیلی مۆڵ.

هەمیش داوا لەوانە کرد ک پەلاماریان دریاگە سەردان پۆلیس پارێزگاگە بکەن ئەرا تەواوکردن ریکارە یاساییەگان، و دووپاتکرد ک هەر کەسیگ تاوانیگ جیوەجی بکەێد قورتاری لە یاسا نێەوود.

بەیاننامەی وەڕێۆبەرایەتی پۆلیس هەولێر ک رەسیە ئاژانس شەفەق نیوز وت: لە شەو سەر ساڵ، پەلاماریگ لە وەردەم فامیلی مۆڵ لە شار هەولێر پایتەخت بوی، و چەن کەسیگ پەلامار گەشتیارەگان لەو شوونە کردن، و زەرەدەیلیگ رەساننە بەشیگ لە پاس و ماشینەگان.

بەیاننامەگە وتیش؛ ئەراوە هێزەیل ئاسایش و پۆلیس ١٦ توومەتبار وەگورەی مادەیل ٤٧٧ و ٤١٣ لە یاسای سزاگان دەسوەسەر کردن.

بەیاننامەگە هەمیش وت؛ هەرکەسیگ کەفتیەسە وەر زەرەدمەنی لەی پەلامارە توێنێد سەردان پۆلیس پارێزگای هەولێر بکەێد ئەرا تەواوکردن ریکارە یاساییەگان.

وەڕێۆبەرایەتی پۆلیس هەولێر دووپاتکرد ک هەرکەسیگ تاوانیگ جیوەجی بکەێد لە یاسا قورتاری نێەوود، و وەزوور هێزەیل وەڕێۆبەرایەتی پۆلیس پارێزگای هەولێر و ئەو هێزە ئەمنیەگان تر کەفێدە وەردەم یاسا.